बिहीबार इरानले इजरायल, अमेरिकी सैन्य आधार शिविर र क्षेत्रीय मुलुकहरूमाथि आक्रमणको नयाँ शृङ्खला सुरु गरेको छ। 

आफ्नो एउटा युद्धपोत डुबाइदिएपछि इरानले अमेरिकालाई यसको परिणाम “अत्यन्तै तितो हुने” र “पछुताउनु पर्ने” चेतावनी दिएको छ। इजरायल र अमेरिकाले विगत छ दिनदेखि इरानमाथि लगातार प्रहार गरिरहेका बेला तेहरानले यो ठूलो प्रत्याक्रमण गरेको हो।

यो युद्ध दिनप्रतिदिन भयावह बन्दै गएको छ र यसको असर मध्यपूर्व तथा त्यसभन्दा बाहिरका थप १४ देशहरूमा फैलिसकेको छ। 

बिहीबार मात्रै अजरबैजानले इरानमाथि मानवरहित यान आक्रमणको आरोप लगाएको छ, यद्यपि इरानले यसलाई अस्वीकार गरेको छ। यसअघि बुधबार अमेरिकाले श्रीलङ्काको समुद्री तट नजिकै इरानको एउटा फ्रिगेट (युद्धपोत) डुबाइदिएको दाबी गरेको थियो।

यसैबीच, लेबनानमा इरान समर्थित हेजबुल्लाह लडाकुहरूसँगको संघर्ष चर्किएपछि इजरायलले बेरुतका दक्षिणी उपनगरहरू पूर्ण रूपमा खाली गर्न आदेश दिएको छ। संयुक्त राष्ट्रसंघका शान्ति सेनाले दक्षिणी लेबनानमा भीषण स्थल युद्ध भइरहेको र थप इजरायली सैनिकहरू सीमा पार गरेर भित्र पसेको पुष्टि गरेका छन्।

शनिबार युद्ध सुरु भएदेखि नै अमेरिका र इजरायलले इरानको सैन्य क्षमता, नेतृत्व र आणविक कार्यक्रमलाई लक्षित गरी देशभर बमबारी गरिरहेका छन्। 

इरानी सर्वोच्च नेता आयतोल्लाह अली खामेनीको सोही आक्रमणमा मृत्यु भइसकेको छ  भने इजरायली तथा अमेरिकी नेताहरूले अब इरानी सरकार ढाल्ने नै आफ्नो मुख्य लक्ष्य रहेको संकेत दिएका छन्।