लामो समयदेखि एकअर्काका कट्टर शत्रु मानिएका इरान र अमेरिकाबीच अहिले एउटा महत्त्वपूर्ण वार्ता भइरहेको छ। इरानले अमेरिकासँग परमाणु सम्झौता गर्न चाहेको छ, जसबाट दुवै देशलाई आर्थिक फाइदा होस्।

इरानका अनुसार यदि यो सम्झौता भयो भने अमेरिकाले इरानको तेल, ग्यास, खानी र जहाज खरिद-बिक्रीमा ठुलो नाफा कमाउन सक्नेछ।

विगत केही समयदेखि यी दुई देशबीच तनाव बढ्दै गएको थियो र युद्ध हुने डर समेत थियो। अमेरिकाले आफ्नो युद्धपोत इरान नजिक पठाएको छ। तर, युद्धभन्दा शान्ति र व्यापार राम्रो भन्ने सोचका साथ अहिले ओमानको मध्यस्थतामा वार्ता सुरु भएको छ।

इरानले आफ्नो ‘युरेनियम’ (परमाणु बम बनाउन प्रयोग हुन सक्ने धातु) को मात्रा घटाउन तयार रहेको बताएको छ। बदलामा, अमेरिकाले इरानमाथि लगाएका विभिन्न आर्थिक प्रतिबन्धहरू हटाउनुपर्ने इरानको माग छ। इरान यसपालिको सम्झौता पहिलेको भन्दा बलियो र अमेरिकालाई पनि फाइदा पुगोस् र सम्झौता नटुटोस् भन्ने चाहेको एनबिसीन्यूजले आफ्नो समाचारमा लेखेको छ ।

अमेरिकी विदेशसचिव मार्को रुबियोले वार्ता सफल पार्न प्रयास भइरहेको बताएका छन्। यद्यपि, इरानले आफ्नो परमाणु कार्यक्रम पूर्ण रूपमा बन्द नगर्ने अडान राखेको छ, जुन अमेरिकाका लागि टाउको दुखाइको विषय हो।

आगामी मंगलबार जेनेभामा हुने बैठकले यो वार्ता कुन दिशामा जान्छ भन्ने कुराको टुङ्गो लगाउनेछ।