अमेरिकी राष्ट्रपति डोनाल्ड ट्रम्पले न्युयोर्कको गभर्नर पदका लागि नासा काउन्टीका प्रमुख ब्रुस ब्लाकम्यानलाई आफ्नो पूर्ण समर्थन दिने घोषणा गरेका छन् । यो घोषणा एलिस स्टेफानिकले चुनाव नलड्ने निर्णय गरेको भोलिपल्टै आएको हो।

ट्रम्पले सामाजिक सञ्जाल ‘ट्रुथ सोसल’ मार्फत ब्लाकम्यानको प्रशंसा गर्दै उनलाई एक “अत्यन्तै सम्मानित र लोकप्रिय” नेता भनेका छन् । ट्रम्पका अनुसार ब्लाकम्यानले अपराध नियन्त्रण, सीमा सुरक्षा र अर्थतन्त्र सुधार्न उत्कृष्ट काम गरेका छन्। ट्रम्पले लेखेका छन् , “ब्रुस सुरुदेखि नै मेरो ‘मागा’ अभियानको साथमा छन् र उनले न्युयोर्कमा कानुनको शासन लागू गर्ने छन् ।”

ब्लाकम्यानले ट्रम्पको समर्थनलाई गौरवको विषय भन्दै खुसी व्यक्त गरेका छन् । उनले भने , “म राष्ट्रपति ट्रम्पको समर्थन पाएकोमा आभारी छु। हामी मिलेर न्युयोर्कलाई सुरक्षित र सस्तो बनाउनेछौँ।”

अहिले न्युयोर्कमा डेमोक्र्याटिक दलको शासन छ, तर रिपब्लिकन नेताहरूले यस पटक बलियो उम्मेदवार उठाएर चुनाव जित्ने लक्ष्य राखेका छन्। ब्लाकम्यानले कर घटाउने, व्यापार बढाउने र अपराधीहरूलाई कडा सजाय दिने कार्यसूची अघि सारेका छन् ।