अष्ट्रेलियामा भएको गोलीकाण्डमा मृतकको संख्या बढेर १६ पुगेको छ । प्रहरीका अनुसार ४० जना अझै अस्पतालमा उपचाररत छन्।

यो आक्रमण यहूदी समुदायलाई लक्षित गरी गरिएको थियो। सयौँ मानिसहरू हनुक्का पर्वको पहिलो दिन मनाउन भेला भएका बेला आक्रमण भएको हो। घटनालाई आतङ्कवादी हमला घोषणा गरिएको छ।

यहूदी समुदायका एक प्रतिनिधिका अनुसार १२ वर्षीया बालिका र एक रब्बी पनि मृतकमा परेका छन्।

अष्ट्रेलियाका प्रधानमन्त्री एन्थोनी अल्बानेजीले यस आक्रमणलाई “हाम्रो राष्ट्रको मुटुमा प्रहार गर्ने दुष्टता, यहूदीविरोधी घृणा र आतङ्कवाद” भन्दै निन्दा गरे।

उनले भने,“यहूदी अष्ट्रेलियालीमाथिको आक्रमण भनेको सम्पूर्ण अष्ट्रेलियामाथिको आक्रमण हो।”

प्रहरीले दुई जना संदिग्ध रहेको पुष्टि गरेको छ। तीमध्ये एक जनाको मृत्यु भइसकेको छ भने अर्का एक जना अस्पतालमा ज्यान जोखिमपूर्ण अवस्थामा उपचाररत छन्। प्रहरी अधिकारीहरूले नजिकैको एउटा गाडीमा भेटिएका विस्फोटक सामग्री सुरक्षित रूपमा हटाएकाछन्।

यसैबीच अमेरिकी राष्ट्रपति डोनाल्ड ट्रम्पले यो सप्ताहन्तमा भएका दुई घातक आक्रमणप्रति शोक व्यक्त गरेका छन्। ती आक्रमणहरूमा रोड आइल्याण्डको ब्राउन विश्वविद्यालयमा भएको सामूहिक गोलीकाण्ड र अष्ट्रेलियाको बोन्डी बीचमा यहूदी समुदायलाई लक्षित आक्रमण समावेश छन्।

ह्वाइट हाउसको क्रिसमस समारोहमा ट्रम्पले भने, “म पीडितहरूप्रति श्रद्धाञ्जली अर्पण गर्न चाहन्छु,” र प्रोभिडेन्समा भएको गोलीकाण्डमा दुई जनाको मृत्यु र नौ जना घाइते भएको उल्लेख गरे।

यसैबीच, हनुक्काको पहिलो दिन भएको आक्रमणपछि एकजुटताको संकेतस्वरूप आइतबार राति यरुशलमस्थित इजरायलको संसद भवन (नेसेट)लाई अष्ट्रेलियाली झण्डाका रङहरूमा झिलिमिली बनाइएको थियो।