संयुक्त राज्य अमेरिकाको न्युयोर्क राज्यस्थित अल्बानी शहरमा एक दुःखद आगलागीको घटनामा २४ वर्षीया भारतीय विद्यार्थी साहजा रेड्डी उदुमालाको निधन भएको छ। उनी भारतको तेलङ्गना राज्यको जनगाउँ जिल्लाकी हुन्।

साहजा उच्च शिक्षाका लागि सन् २०२१ मा अमेरिका आएकी थिइन्। प्रारम्भिक जानकारीअनुसार, आगो छिमेकी भवनबाट सुरु भई उनको घरमा द्रुत गतिमा फैलियो। आगलागी हुँदा उनी सुतिरहेको र भाग्न नसकेको बताइएको छ।

न्यूयोर्कस्थित भारतीय महावाणिज्य दूतावासले सामाजिक संजाल ‘एक्स’ मार्फत गहिरो दुःख व्यक्त गर्दै साहजाको परिवारलाई सहयोग गरिरहेको जनाएको छ।

टीसीएसका कर्मचारी पिता र सरकारी शिक्षिका माताले छोरीको पढाइ सकेर फर्किने व्यग्र प्रतीक्षा गरिरहेका थिए, तर अब उनीहरूको पीडा असहनीय बनेको छ। उनीहरूले छोरीको पार्थिव शरीर स्वदेश फर्काउन सरकारलाई सहयोगको लागि अनुरोध गरेका छन्।

साहजाको फुपुको छोराले परिवारलाई आर्थिक सहयोग गर्न गोफन्डमी अभियान सुरु गरेका छन्। गोफन्डमीमा जनाईए अनुसार साहजाको शरीरको करिब ९० प्रतिशत भाग जलेको थियो। संकलित रकम अन्त्येष्टि, शव स्वदेश फर्काउने र परिवारलाई तत्काल सहयोग गर्न प्रयोग गरिनेछ।