अमेरिकी राष्ट्रपति डोनाल्ड ट्रम्पले भेनेजुएलाका शासक निकोलस मादुरोलाई तुरुन्तै पद छोडेर देशबाट बाहिरिनका लागि कडा चेतावनी दिएको फक्सन्यूज, न्यूयोर्क पोष्ट तथा मायामी हेराल्डले समाचार प्रकाशित गरेका छन् ।

यी संचार माध्यमका अनुसार चेतावनी दिएलगत्तै अमेरिकाले भेनेजुएलाको सम्पूर्ण हवाइ मार्ग बन्द गर्ने घोषणा गरेको उल्लेख गरेको छ ।

‘मायामी हेराल्ड’ पत्रिकाका अनुसार, वासिङ्टनले दूरवार्ता (टेलिफोन)मार्फत मादुरो, उनकी पत्नी सिलिया फ्लोरेस र छोरालाई देश छोड्ने सुरक्षित बाटो दिने प्रस्ताव गरेको थियो, तर यो प्रस्ताव तब मात्र लागू हुने थियो जब मादुरोले तत्काल राजीनामा दिन्थे।

स्रोतका अनुसार, मादुरोले दुईवटा ठूला माग राखेपछि कुराकानी अड्कियो। पहिलो, उनले आफू र आफ्नो समूहले गरेका सबै अपराधका लागि ‘विश्वव्यापी माफी’ मागे। दोस्रो, उनले सेनाको नियन्त्रण आफ्नो हातमा राख्न पाउनुपर्ने माग गरे। अमेरिकाले यी दुवै मागलाई ठाडै अस्वीकार गर्‍यो।

यी कुराहरू नमिलेपछि ट्रम्पले भेनेजुएलाको हवाइ क्षेत्रलाई ‘पूर्ण रूपमा बन्द’ गर्ने घोषणा गरे। भेनेजुएलाका पूर्व कूटनीतिज्ञ भेनेसा न्युम्यानले यो घोषणा ठूलो सैन्य कारबाहीको स्पष्ट सङ्केत भएको बताएका छन् । उनका अनुसार मादुरोको शासन अब सबैभन्दा गम्भीर खतरामा छ, किनकि भेनेजुएलाको सेना वर्षौंको भ्रष्टाचार र पुरानो हतियारका कारण धेरै कमजोर भइसकेको छ।