अमेरिकी राष्ट्रपति डोनाल्ड ट्रम्पले इरानलाई “अन्तिम मौका” प्रस्ताव प्रस्तुत गर्ने अपेक्षा गरिएको छ । अमेरिकी र युरोपेली अधिकारीहरूले सोमबार ‘द जेरुसेलम पोस्ट’ लाई यस्तो जानकारी दिएका छन्।

फक्सन्यूजका अनुसार ट्रम्पले क्यानडामा आयोजित जी ७ शिखर सम्मेलनमा पत्रकारहरूसँग कुरा गर्दै इरानले इजरायलको लगातारको आक्रमणलाई रोक्न आफ्नो प्रशासनसँग सम्पर्क गरेको बताएका छन्। इजरायलका यी आक्रमणहरूले इरानका आणविक सुविधाहरू र सैन्य स्थलहरूलाई ठूलो क्षति पुर्‍याएका छन्।

ट्रम्पले भने, “यस्तो देखिन्छ कि इरान यो युद्ध जितिरहेको छैन। धेरै ढिलो हुनुअघि उनीहरूले कुरा गर्न आवश्यक छ।” इजरायलले इरानमाथि जुन १३, २०२५ देखि “अपरेशन राइजिंग लायन” नामक कारवाहीद्वारा दर्जनौं स्थानमा आक्रमण गरेको छ, जसमा महत्वपूर्ण आणविक स्थलहरू र सैन्य प्रतिष्ठानहरूमा क्षति पुगेको छ। यसबाट सयौं इरानीहरू, जसमा उच्च सैन्य नेताहरू र आणविक वैज्ञानिकहरू पनि समावेश छन्, मारिएका छन्।

एक अधिकारीले पत्रिकालाई बताएअनुसार, ट्रम्पको यो नयाँ प्रस्ताव यसै महिनाको सुरुमा इरानीहरूलाई पेश गरिएको अघिल्लो प्रस्तावभन्दा केही हदसम्म राम्रो हुन सक्छ। इजरायलले इरानको आणविक कार्यक्रमलाई रणनीतिक खतरा मान्दै आएको छ र आणविक हतियार विकास गर्नबाट रोक्नको लागि यो सैन्य कारबाही गरेको बताएको छ।

इरानले आफ्नो आणविक कार्यक्रम शान्तिपूर्ण उद्देश्यका लागि मात्र भएको दाबी गरे पनि अन्तर्राष्ट्रिय निरीक्षकहरूले हतियार निर्माणको लागि पर्याप्त मात्रामा युरेनियम संवर्धन गरेको प्रमाण फेला पारेका छन्। इजरायलको पछिल्लो हमलापछि, अन्तर्राष्ट्रिय आणविक ऊर्जा एजेन्सी(निकाय)ले इरानका केही आणविक स्थलहरूमा क्षति पुगेको पुष्टि गरेको छ, यद्यपि आइएईएका निरीक्षकहरू अझै पनि इरानमा उपस्थित छन् र सुरक्षा अवस्थाले अनुमति दिएपछि निरीक्षण जारी रहनेछ।

यो “अन्तिम मौका” प्रस्तावले मध्यपूर्वमा बढ्दो तनावलाई कम गर्न र सम्भावित ठूलो द्वन्द्वलाई रोक्न महत्वपूर्ण भूमिका खेल्न सक्ने अपेक्षा गरिएको छ।