अमेरिकी राष्ट्रपति डोनाल्ड ट्रम्प र बेलायती प्रधानमन्त्री किर स्टारमरले सोमबार दुई देशबीचको व्यापार सम्झौतामा हस्ताक्षर भइरहेको घोषणा गरेका छन्। यस सम्झौताले दुवै देशका वस्तुहरूमा लाग्ने भन्सार शुल्कमा उल्लेख्य कटौती गर्नेछ।

यद्यपि, यो सम्झौतामा इस्पातमा लाग्ने भन्सार शुल्क समावेश गरिएको छैन, जुन दुईपक्षीय व्यापारको विशेष महत्वपूर्ण अंश हो। इस्पातमा लाग्ने भन्सार शुल्कलाई अस्थायी सम्झौतामा योजनाबद्ध रूपमा शून्यमा झार्ने विषयमा भने वार्ता अझै जारी छ।

एपीका अनुसार ट्रम्प र स्टारमरले गत मे महिनामा एक सम्झौतामा पुगेको घोषणा गरेका थिए। त्यसबेला, उक्त सम्झौताले बेलायती कार, इस्पात र एल्युमिनियममा लाग्ने अमेरिकी आयात कर घटाउने र त्यसको बदलामा अमेरिकी उत्पादनहरू, जसमा गाईको मासु र इथेनोल समावेश छन् ।

तर, यो सम्झौता तत्काल कार्यान्वयनमा नआएकोले बेलायती व्यवसायहरूलाई ट्रम्पबाट कुनै अप्रत्याशित शुल्क वृद्धिको सामना गर्नुपर्ने हो कि भन्ने अनिश्चितता बढेको थियो। यसै महिनाको सुरुमा, ट्रम्पले विश्वभरका देशहरूमा धातुको भन्सार शुल्क दोब्बर गरी ५० प्रतिशत पुर्‍याउँदा बेलायती व्यवसायहरू र बेलायत सरकार आश्चर्यचकित बनेका थिए। पछि, उनले बेलायतका लागि भने यो स्तर २५ प्रतिशतमै रहने स्पष्ट पारेका थिए।

प्रधानमन्त्री स्टारमरले सोमबार भने कि व्यापार सम्झौता “अब कार्यान्वयनको अन्तिम चरणमा छ, र मलाई आशा छ कि यो चाँडै नै पूरा हुनेछ।” राष्ट्रपति ट्रम्पले भने, यो सम्झौताले “धेरै रोजगारी र धेरै आम्दानी उत्पादन गर्नेछ।”

यो सम्झौता दुई देशको आर्थिक सम्बन्धका लागि एक महत्वपूर्ण कोसेढुङ्गा मानिएको छ, यद्यपि इस्पातमाथि लाग्ने शुल्कको विषयले अझै पनि पूर्ण स्पष्टता दिएको छैन। यसले दुवै देशका उपभोक्ता र व्यवसायलाई प्रत्यक्ष लाभ पुग्ने अपेक्षा गरिएको छ।