विराटनगर,१३ असोज(रासस): उद्योग संगठन मोरङले विराटनगरमा आगामी मङ्सीर २९ गतेदेखि पुस ६ गतेसम्म अन्तराष्ट्रिय औद्योगिक प्रदर्शनी(विराट एक्स्पो) आयोजना गर्ने भएको छ ।
संगठनद्वारा आज यहाँ आयोजित पत्रकार सम्मेलनमा कृषि, पर्यटन, उद्योग र व्यापारको प्रवद्र्धनका लागि सातौं संस्करणको ‘विराट एक्स्पो’ आयोजना गर्ने लागिएको जनाएको छ । स्नातककोत्तर क्याम्पस विराटनगर–१४ स्थित पुरानो हवाई मैदानमा एक्स्पो आयोजना गरिने भएको छ।
संगठन अध्यक्ष सुयश प्याकुरेलले कृषि उत्पादन, कृषि उद्यम, उद्योग, पर्यटन लगायतका क्षेत्रको विकासमा योगदान पु¥याउन एक्स्पो आयोजना गरिएको बताउनु भयो । संगठनका उपाध्यक्ष एवं विराट एक्स्पो–२०७९ का संयोजक भोलेश्वर दुलालले अर्थतन्त्रलाई चलायमान बनाउन एक्स्पोको आयोजना गरिन लागिएको जानकारी दिनु भयो ।
मोरङ व्यापार सङ्घका अध्यक्ष नविन रिजालले समान उद्देश्य रहेका संस्थाबीच सहकार्य गरेर बढीभन्दा बढी एक्स्पो आयोजना गर्नुपर्नेमा जोड दिनु भयो ।
उद्योगीबीच अनुभव आदान प्रदान, स्टार्टअप कर्नर, पर्यटकीय गन्तव्यको जानकारी तथा दैनिक प्याकेज टुर, स्थानीय खानाको परिकारको व्यवसायीकरणको खोजी एक्स्पोबाट गरिने छ । प्रदर्शनीमा ४१५ स्टल राखिने भएको छ भने स्वदेश तथा भारत , बङ्गलादेश, भूटान, पाकिस्तान, थाइल्याण्ड, चीनका उत्पादन, वितरक तथा बजार प्रवद्र्धकको समेत स्टलहरु रहने छन् ।
एक्स्पोमा स्थानीय तथा भारतीय सहित तीन लाख सर्वसाधारणले अवलोकन गर्ने अनुमान गरिएको छ भने रु ५० करोडको व्यापार हुने दावी गरिएको छ। एक्स्पो आयोजनाका लागि रु दुई करोड ५० लाख खर्च हुने आयोजकले जनाएको छ।
प्रतिक्रिया