प्रदेश नं १ आर्थिक विधेयक माथिको छलफल समाप्त

इनेप्लिज २०७९ असार ९ गते ०:१५ मा प्रकाशित

विराटनगर,८ असार(रासस): प्रदेश नं १ प्रदेश सभाको १० औँ तथा बजेट अधिवेशनअन्तर्गत आज वसेको वैठकमा आर्थिक विधेयकमाथि छलफल समाप्त भएको छ ।

यसअघि विधेयक माथिको छलफलमा प्रदेश सभा सदस्य पदमकुमारी गुरुबले बजेटप्रति समर्थन गर्दै संखुवासभाको धेरै स्थानमा पर्यटकीय स्थलमा पूर्वाधार निर्माणतर्फ ध्यानाकर्षण गराउनु भयो ।

अर्का सदस्य विमल कार्कीले व्यापार प्रदर्शनी, मेला सांस्कृतिक कार्यक्रमलाई करमा समेटनु पर्ने सुझाव दिनु भयो । सदस्य मोहनकुमार खड्काले प्रदेश सरकारले कृषि आयमा कर लगाउने सम्वन्धमा प्रष्ट पार्नु पर्ने धारणा राख्दै ठेक्का पट्टामा काटिने निर्माण कोष प्रदेशमा रहनु पर्ने ध्यानकर्षण गराउनु भयो ।

अर्का सदस्य सरिता थापाले प्रदेशलाई आत्मनिर्भर बनाउनु करको दायरा वढाउन पहल गर्नु पर्नेमा जोड दिनु भयो । सदस्य सावित्राकुमारी रेग्मीले जेष्ठ नागरिकको उमेर ६८ वर्षलाई आधार तयगरी घरजग्गा रजिष्ट्रेशमा छुट दिनु सुझाव दिदै दण्ड जरिवाना प्रभावकारी रुपमा कार्यान्वयन गर्नुपर्ने धारणा राख्नु भयो ।

यसअघि शुन्य समयमा बोल्दै अम्विका थापाले पेट्रोलियम पदार्थको मूल्य अविलम्व घटाउन सरकारको ध्यानाकर्षण गराउनु भयो । सदस्य ज्योति सव्वाले सुनसरीको इनरुवा वहुमखी क्याम्पस जीर्ण अवस्थामा रहेकोले बजेटको व्यवस्था गर्न माग गर्दै सोही क्षेत्रका स्वास्थ्य स्वयमसेविकालाई यातायातका लागि साइकल उपलव्ध गराउन आग्रह गर्नु भयो ।

उपसभामुख सरस्वती पोखरेलले प्रदेश सभाको अर्को वैठक असार १२ गते दिनको १ बजे वस्ने सदनलाई जानकारी दिनु भयो ।

प्रतिक्रिया