अंग्रेजीका सुर ताल पस्कंंदै छन्
मातृ भाषा अलप भैराछन् यहाँ ।
पहुंचकाहरु नायक बन्दै हिंड्छन्
राजनितिको चलखेल रच्दै यहाँ ।
महङ्गीले काँचुली फेरीसके छन्
निम्नको चुलो नबल्ने भो यहाँ ।
निमुखाहरु रंगमंचका पात्र भा छन्
ठूला ठालुको धक्कु साह्रो भो यहाँ ।
‘महोदय’ संस्कार गुमाउँदा रहेछन्
गरिबको चन्दा असुली हुंदै छ यहाँ ।
भतभती घाउहरु टट्टाइ रहेछन्
औषधी जडिबुटी लोप भो यहाँ ।
कालो रगत खरिद बिक्री भइरछन्
नकाबधारी मानवता धेर भो यहाँ ।
मुर्दाहरु पनि अलपत्रि रहेका छन्
भेन्टिलेटरको साह्रो चलखेल यहाँ ।
शक्ति र बलमा रवाफ चलि रछन्
बिना गल्ती बन्दी थुप्रंदै छन् यहाँ ।
अस्मिता लुट्नेहरु बिगबिगी नै छन्
खुल्ला आकाश उधारो लिन्छन् यहाँ ।
होसै डगमगाउँदो नाता किन्छन्
सरमको सीमा अत्यधिक भो यहाँ ।
जीउँदाहरु मरे तुल्य अस्ताइ रहेछन्
ब्यूँताउने चाँजो पाँजो छंदै छैन यहाँ ।
भावनाका माला उन्नेहरु धेरै छन्
अब सपना पनि भयावह भो यहाँ ।
रोजगारीमा पहुंच धकेलि रहेछन्
बिदेशीनेको कुनै वास्तै छैन यहाँ ।
जसले जे गरे पनि चलि रहेछन्
लाज पचाउन आपत्तिनै भो यहाँ ।
मान्छेले मान्छे चिन्न छोडिसके छन्
कुनिति संस्कृति पराकाष्ठा भो यहाँ ।
सगरमाथा पनि झुक्न खोज्दैछन्
अर्थ छैन जे जति झुके पनि यहाँ ।
आनै माटो सहजै गिज्याइ रहेछन्
धर्तिलाई बोझ अब साह्रो भो यहाँ ।
-अलका मल्ल, काठमाडौं
प्रतिक्रिया