एनआरएनको नर्थ क्यारोलाइना च्याप्टरले गर्यो केरीमा स्याण्ड भलिवल प्रतियोगिता
इनेप्लिज
२०७५ भदौ ६ गते १६:५१ मा प्रकाशित
गैरआवासीय नेपाली संघ राष्ट्रिय समन्वय समिति अमेरिकाको नर्थ क्यारोलाइना च्याप्टरले गत अगष्ट १८ र १९ मा नर्थ क्यारोलाइनाको केरी शहरमा स्याण्ड भलिवल प्रतियोगिता सम्पन्न भयो ।
प्रतियोगितामा नर्थ क्यारोलाइनाको रिसर्च पार्क क्षेत्र वरपरका सात समूहको सहभागिता रहेको थियो । प्रतियोगितामा लायन्स समूह पहिलो, आरटीपी समूह दोस्रो र एनसीएनसी बोर्ड समूहले तेस्रो स्थान प्राप्त गरेका थिए ।
विजयी समूहहरूलाई गैरआवासीय नेपाली संघ राष्ट्रिय समन्वय समिति अमेरिकाको नर्थ क्यारोलाइना च्याप्टरका अध्यक्ष बाबुराम पोखरेल र कार्यक्रमकी प्रमुख अतिथि तथा गैरआवासीय नेपाली संघ राष्ट्रिय समन्वय समिति अमेरिकाकी उपाध्यक्ष्य राधा पौडेलले ट्रफी, मेडल र प्रमाण- पत्र वितरण गर्नुभएको थियो ।
आयोजक संस्थाका अध्यक्ष बाबुराम पोखरेलले खेलमार्फत स्थानीय नेपाली समुदाय वीच चिनाजानीलाई बढाउने र सामाजिक भावनालाई अझ फराकिलो पार्ने उद्येश्यका साथ आयोजना गरिएको कार्यक्रम समुदायका सदस्यहरूको उत्साहजनक सहभागिताका कारणले सफल भएको बताउनुभयो ।
अध्यक्ष पोखरेलले पुरस्कार सौजन्यताको लागि एन आर एन आइ सी सी अमेरिका क्षेत्रका संयोजक गौरी जोशी र भास्तिका कम्पनीलाई आयोजककातर्फ बाट धन्यवाद प्रकट गर्नुभयो ।
प्रमुख अतिथि राधा पौडेलले युवाहरूलाई परिचालन गरी मनोरंजन र सामाजिक सद्भाव बढाउने कार्यक्रम आयोजना गरेकोमा नर्थ क्यारोलाइना च्याप्टरलाई धन्यवाद दिंदै प्रतियोगितामा विजयी समूहहरूलाई बधाई दिनुभएको थियो ।
प्रतिक्रिया