गत वैशाख १२ गतेको भूकम्पले दरबारस्थित विभिन्न संरचना ध्वस्त भएपछि पर्यटक आउन छाडेका थिए । अङ्ग्रेजी महिना मार्चको सुरुदेखि नै पर्यटकको उल्लेखनीय वृद्धि भएको पाटन सङ्ग्रहालयका अधिकृत सुरेशमान लाखेले बताउनुभयो । उहाँका अनुसार दैनिक ५० जनाको हाराहारीमा बाह्य पर्यटक सङ्ग्रहालय, कृष्ण मन्दिर, भीमसेन मन्दिरलगायत अवलोकन गर्न आउने गरेको बताउनुभयो ।

यसैगरी, आन्तरिक पर्यटकको समेत वृद्धि कायम रहेको उहाँको भनाइ छ । पर्यटक आगमनसँगै सङ्ग्रहालयको आम्दानी पनि वृद्धि भएको उहाँले बताउनुभयो । त्यहाँ आउने बाह्य पर्यटकले प्रतिव्यक्ति रु ४०० रुपैयाँ शुल्क बुझाउनुपर्ने उहाँको भनाइ छ ।

यसैगरी, आन्तरिक पर्यटकका लागि रु तीस रुपैयाँ शुल्क बुझाउनुपर्दछ । भूकम्पले सम्पदा सूचीमा परेको संरचना ध्वस्त बनाएपछि लामो समयको अन्तरालमा दरबार क्षेत्रको अवलोकन गर्न बढेको पर्यटकको आगमनले सकारात्मक सन्देश गएको उहाँले उल्लेख गर्नुभयो । भूकम्पले दरबार क्षेत्रमा रहेको विश्वनाथ तथा चारनारायण मन्दिर पूर्णरुपमा ध्वस्त भएको थियो ।