खोला आसपासमा सञ्चालित क्रसर उद्योगले बालुवा धोएको पानी नदीमा मिसाएपछि नदी धमिलो हुनुको साथै आसपासका क्षेत्रमा खानेपानीको समस्या भएको छ ।

भूकम्पले विभिन्न ठाउँको खानेपानीको मुहान सुकेपछि अहिले इन्द्रवतीको धमिलोपानी खानुपर्ने बाध्यता भएको सिपापोखरे, भिमटार, भोटसिपा, बाँडेगाउँ, बाँसवारी, फटकशिला र सिपाघाटका स्थानीवासीले गुनासो गरेका छन् ।

स्थानीय सिपाघाटवासी किशोर विद्याधरका अनुसार बालुवा धोएको पानी खोलामा मिसाउँदा खानेपानीमा मात्र होइन पूरा वातावरण नै प्रदूषित भएको छ ।

अहिले इन्द्रावती नदी किनारको बस्तीमा बसोबास गर्दै आएका करिब दुई हजार १०० घरपरिवार पानीको सुविधाबाट वञ्चित भएका छन् ।
क्रसरले यसअघि नदीबाट बालुवा गिट्टी निकाल्दा खोला गहिरिएर सिँचाइ गर्न कुलोमा पानीसमेत नचडेकाले यहाँका किसान थप समस्यामा परेका छन् ।