न्यूयोर्क,अमेरिका,जनवरी ११ | अमेरिकामा रहेका नेपाली पत्रकारहरुको संस्था नेपाल अमेरिका पत्रकार संघ (नेजा) ले आफ्नो अधिवेशनको तयारीसँगै सदस्यताका लागि दरखास्त आव्हान गरेको छ | सदस्यता वितरण निरन्तर जारी रहने प्रक्रिया भए पनि अधिवेशनको तयारीसँगै सदस्यता नवीकरण गर्न र नयाँ सदस्य बन्न चाहने कतिपय संचारकर्मीहरुका लागि सहज होस् भन्ने उद्देश्यले सदस्यता खुला गरिएको नेजाले जनाएको छ | नेजाको विद्यमान विधान अनुसार,प्रत्येक दुई वर्षमा सदस्यता नवीकरण गर्नुपर्नेछ | नवीकरण वापतको शुल्क एकमुष्ठ रुपमा पचास डलर तोकिएको छ |
यसैगरी नयाँ सदस्यता लिन इच्छुक संचारकर्मीहरुले पनि दुई वर्षका लागि पचास डलर शुल्कसहित सदस्यता आवेदन गर्न सक्नेछन् | विधान अनुसार रीतपूर्वक आवेदन प्राप्त भएमा नेजा कार्य समितिले सदस्यता दिने अन्तिम निर्णय गर्नेछ | यसका लागि वर्तमान कार्य समितिका तर्फबाट महासचिव भोला आचार्यको संयोजकत्वमा सदस्यता वितरण एवं नवीकरण समिति गठन गरिएको छ | समितिमा कार्य समितिका अध्यक्ष गौतम दाहाल,सचिव सुदीप पन्त र कोषाध्यक्ष बिटु केसी बाहेक सबै पदाधिकारी र सदस्यहरु रहेका छन् |
समितिका तर्फबाट संयोजक आचार्यले एक सूचना प्रकाशित गरी आगामी अप्रिल १ तारिखभित्र सदस्यता नवीकरण र नयाँ आवेदनका लागि दरखास्त आव्हान गर्नु भएको छ | नेजाको विधान अनुसार अधिवेशनको एक महिना पहिले नै सदस्यता लिई सकेका र नवीकरण गरिसकेका सदस्यहरुले मात्र अधिवेशनमा आधिकारिक रुपमा भाग लिन,नेतृत्व चयन प्रक्रियामा सहभागी हुन र उम्मेदवार हुन पाउनेछन् |
नेजाको पाँचौं अधिवेशन आगामी मे महिनाको ७ र ८ तारिख क्यालिफोर्नियाको लस एञ्जलस शहरमा हुँदैछ | यसका लागि सचिव सुदीप पन्तको संयोजकत्वमा एक अधिवेशन आयोजक मूल तयारी समिति गठन गरी अधिवेशन प्रक्रिया अघि बढाइएको छ |
नेजाले सदस्यता नवीकरण र नयाँ आवेदनका लागि जारी गरेको सूचना यहाँ जस्ताको तस्तै प्रकाशित गरिएको छ |
विगत एक दशकदेखि उत्तर अमेरिका क्षेत्रमा रहेका नेपाली सञ्चारकर्मीहरुको साझा संस्था नेपाल अमेरिका पत्रकार संघ (नेजा) को आगामी मे महिनाको ७ र ८ मा हुन गैरहेको पाँचौं अधिवेशनमा हार्दिक स्वागत गर्दछौं । नेजाको विद्यमान विधान अनुसार अधिवेसनको एक महिना अगावै अर्थात् आगामी अप्रिल १,२०१६ भित्र सदस्यताको नविकरण तथा नयाँ सदस्यता प्राप्त गरिसक्नु पर्ने भएकोले सदस्यता खुला गरिएको जानकारीसहित यो सूचना प्रकाशन गरिएको छ ।तसर्थ नेजाको विधान अनुसार सदस्यता लिन एवं नविकरण गर्नको लागि सम्पूर्ण सदस्यहरुमा हार्दिक अनुरोध गरिन्छ । सदस्यता सिफारिशका लागि नेजा कार्यसमितिले महासचिव भोला आचार्यको संयोजकत्वमा एक समिति गठन गरी जिम्मेवारी सुम्पिएको छ । महासचिव आचार्यको संयोजकत्वमा गठित सदस्यता वितरण तथा नविकरण समितिमा नेजाका सबै क्षेत्रीय संयोजकहरु डाक्टर गोविन्द सिंह रावत, भुपेन्द्र थापा,जाङ्ग्वु शेर्पा,विकासराज न्यौपाने र विश्वराज थापासहित कार्यकारी सदस्यहरु मधुकर अधिकारी, अग्नी चौलागाई,शैलेश पोखरेल र तेम्वा दोङ्गवा ह्योल्मो सदस्य रहेको समिति गठन गरिएको छ । नेजाको विधान अनुसार अधिवेशनको एक महिना पहिले नै सदस्यता लिईसकेको,नवीकरण गरिसकेको र सदस्यता शुल्क तिरिसकेको सदस्यले मात्र आफ्नो मताधिकार प्रयोग गर्न,उम्मेदवार बन्न वा समर्थक,प्रस्तावक बस्न पाउनेछ ।
त्यसैले नयाँ सदस्यताको लागि मिडियामा प्रकाशित एवं प्रसारित दुई वटा समाचार सामाग्री तथा लेखसहित आफ्नो विवरण खुलाएर सदस्यता आवेदन गर्नुहुन अनुरोध छ । तपाईले नयाँ सदस्यता लिन तथा नविकरणको लागि संस्थाको वेभसाईट http://www.neajausa.org/np/membership मार्फत् पनि अनुरोध गर्न सक्नुहुनेछ ।

नेजाको सदस्यता शुल्क
नविकरण शुल्क : ५० डलर
नयाँ सदस्य : ५० डलर ( दुई वर्षका लागि )
तपाईसँग सदस्यता सम्वन्धि अन्य जिज्ञासा भए हामीलाई ईमेल गर्न सक्नुहुनेछ ।
नयाँ सदस्यता तथा नविकरणवापत लाग्ने शुल्क हाम्रो पे पाल एकाउन्ट https://www.paypal.com/us/cgi-bin/webscr?cmd=_flow&SESSION=84y-RQAEJN_ZLu3CpDSQlOqk5xK_VgYphktiH3QsDRFLzZEDxMYM_2l_-tK&dispatch=5885d80a13c0db1f8e263663d3faee8d64ad11bbf4d2a5a1a0d303a50933f9b2 मार्फत तिर्न सक्नुहुनेछ । साथै,चेक अथवा मनि अर्डरमा Nepal America Journalist Association अथवा NEAJA लेख्नुहोस् र तलको ठेगानामा मेल गर्नुहोस् |

विटु केसी
कोषाध्यक्ष, नेजा
Address: 6360 Vreekbend Dr Houston, TX 77096
अथवा
गौतम दाहाल
अध्यक्ष, नेजा
Address: 6107 Bellona Ave Apt. 3C Baltimore, MD 21212

भोला आचार्य
संयोजक, नेजा सदस्यता वितरण तथा नवीकरण समिति