महेन्द्रनगर (धनुषा), १५ मङ्सिर । संयुक्त लोकतान्त्रिक मधेसी मोर्चाका कार्यकर्ताले आज धनुषामा एक मोटरसाइकलमा आगजनी गरेर क्षति पुर्याएका छन् ।
जर्किनमा पेट्रोल लिएर जनकपुर पिराडी चोकतर्फ जाँदै गरेको एक मोटरसाइकलमा आन्दोलनकारीले आगजनी गरेका छन् । जनकपुर चुरोट कारखाना गेट अगाडि आगजनी गरिएको मोटरसाइकल जलेर पूर्णरुपमा नष्ट भएको छ ।
संयुक्त लोकतान्त्रिक मधेसी मोर्चा, मातृका यादव नेतृत्वको संयुक्त मधेसी राष्ट्रिय आन्दोलन समिति र मधेस क्रान्ति सङ्घर्ष समितिको संयुक्तरुपमा निस्केको जुलुसले उक्त मोटरसाइकलमा आगजनी गरेको हो ।
भारतीय बजारबाट १२० लिटर पेट्रोल ल्याई तस्करी गर्न गइरहेको आरोप लगाई ज १ प ६०२३ नम्बर मोटरसाइकलमा आगजनी गरिएको आन्दोलनकारीले जनाएका छन् ।
आन्दोलनकारीले यसअघि पेट्रोलियम पदार्थ बोकेको आरोपमा एक दर्जन मोटरसाइकल र दुई ट्रकमा आगजनी गरेका छन् भने दर्जनौँ बस तथा ट्रकमा तोडफोड गरेका छन् ।
प्रतिक्रिया