यति बेला नेपालीको एउटा समूहले त्यस्तै सगुन संसारलाई उपहार दिइरहेको छ। सगुन अर्थात् सगुन डट कम (सामाजिक सञ्जाल) पूर्वीय चिन्तन र दर्शनदेखि पश्चिमा विचारसम्मलाई एकै ठाउँमा समेट्ने योजनाका साथ चुचुरो चुम्ने अभियानमा होमिइसकेको छ।   (पेन्टागन छाडेर सगुनतिर)

अमेरिकामा बस्ने नेपालीको समूहले प्रविधि र सामाजिक सञ्जालको भविष्य उज्ज्वल देखेर सुरु गरेको यो कार्यले सफलताका सिँढी चढ्न थालिसकेको छ।

सगुनलाई संसारकै नम्बर एक सामाजिक सञ्जाल बनाउने नेपाली सपनाले बिस्तारै भारतीय, चिनियाँ र पश्चिमालाई डो याइरहेको छ । दिनप्रतिदिन सगुन डटकम साइन अप गर्नेको ग्राफ उकालो चढ्दैछ।

पेन्टागनका जागिरे गोविन्द गिरीको अगुवाइमा कविन सिटौलासहितको समूहले सगुन जन्माएका हुन्। आफ्नो यात्रामा सगुनले आइतबारदेखि अर्को एक खुड्किलो चढ्दैछ।

सामाजिक सञ्जालले बिरलै ध्यान दिने संस्करण (भर्सन) सार्वजनिक गर्ने थालनी सगुनले नेपालबाट गरेको छ । सगुन डट कमको पहिलो संस्करण अमेरिकाबाट सार्वजनिक गरेको सगुन समूह यति बेला नेपालमा छ।

नेपालबाट यसको दोस्रो संस्करण सार्वजनिक गरेर नेपालीले थालेको सामाजिक सञ्जालमा नेपालीकै सहयोग लिने र छुट्टै स्थान बनाउने उनीहरूको सपना छ।गिरी भन्छन्, ‘हामीलाई सहयोग गर्छौं भनेर आउनेको संख्या बढिरहेको छ। हामी अर्थपूर्ण सहभागिता र अर्थपूर्ण सामाजिक सञ्जालको परिकल्पना गरिरहेका छौं र नेपाली उत्पादन विश्वबजारमा पुर्‍याउँछौं।’

सगुनले अघि सारेको थिम हो कनेक्ट, सेयर एन्ड अर्न अर्थात् सामाजिक सञ्जालमा जोडिनुहोस्, आफ्ना अनुभव र सकारात्मक सिकाइ करोडौंका बीचमा बाँड्नुहोस् र केही कमाउनुहोस्। गिरीले भने,’हामी खुसी र सकारात्मक विश्व बनाउन चाहन्छौं। सामाजिक सञ्जाललाई सकारात्मक सिकाइ र अनुभव साट्ने थलो बनाउने हाम्रो उद्देश्य अन्य सामाजिक सञ्जालको भन्दा भिन्न पहल हो।’

‘हामी सगुनमार्फत सकारात्मक कुरालाई मात्रै बढावा दिन चाहन्छौं। हाम्रो समूह त्यसैलाई मूल मन्त्र मानेर दौडिरहेको छ’, सगुनका अर्का अभियन्ता सिटौलाले थपे । सामाजिक सञ्जालका अधिक प्रयोगकर्ता रहेको भारतमा सगुनले आफ्नो सञ्जाल विस्तार गर्न थालिसकेको छ।

‘भारतीयको पनि सगुनप्रति ठूलो सहयोग र सद्भाव रहेको छ, दक्षिण एसियाको उत्पादनलाई प्रोत्साहन र प्रयोग गर्नेमा भारतीय सहमत छन्’, सगुनकी दक्षिण एसिया संयोजक स्वाती दयालले अन्नपूर्णसँग भनिन्।

उनले भारतीय सेलिब्रिटी समेत दक्षिण एसियाबाट विश्व यात्रामा निस्किएको सगुनलाई साथ दिन तयार रहेको सुनाइन्। सगुनको एन्ड्रोइड एप्स केही महिनाभित्रै भारतको मुम्बइबाट सार्वजनिक गर्ने योजना उनीहरूले बनाएका छन्।

सगुन थाल्नुअघि गिरी समूहले लामो अनुसन्धान गरेको थियो । अनुसन्धानपछि मात्रै करोडौं रुपैयाँ खर्च गरेर सगुन थालेका हुन्। पेन्टागनको जागिर छोडेपछि गोविन्द र समूहले गुगल र याहुमाथि अनुसन्धान थालिसकेका थिए।

गुगल र याहुमा भएका कमजोरी खोज्दै नयाँ सर्चइन्जिन र सामाजिक सञ्जाल बनाउने उनको सपना थियो । लामो अनुसन्धानपछि धेरै नयाँ फिचरसहित सगुन सर्च इन्जिन २००९ मा उनीहरूले सार्वजनिक गरेका थिए।

‘सगुन आएपछि अमेरिकामा खैलाबैला मच्चियो। मलाई गुगलले फोन गर्‍यो। अहिले फेसबुकमा भएकी सर्लियाले पनि मलाई फोन गरेर के चाहियो भनेर सोधेकी थिइन्’, गिरीले सम्झिए। छलफलकै क्रममा सगुन टिमले याहुसँग समझदारी गर्‍यो। ‘यसले हामीलाई उचाइमा पुग्न सकिन्छ भन्ने आत्मविश्वास झन् बढायो’, गिरीले भने।

सर्च इन्जिन बनाउने बेला गिरी समूहले धेरै नाममाथि विचार विमर्श गर्‍यो। ‘बोल्न र सम्झिन सजिलो नाम खोज्दा सगुनमा पुगेर अडियौं,’ सिटौलाले भने। एसियन र नपाली नाम ब्रान्डिङ गर्ने उद्देश्यले सगुनको स्पेलिङ बदलेर सगून (एसएजीओओएन) बनाए । त्यही सर्च इन्जिन गत वर्षदेखि सामाजिक सञ्जालका रूपमा आएको छ।

गिरीले भने, ‘अबको युग सोसल नेटवर्क र सूचना बाँडफाँट नै हो। अर्थपूर्ण सूचना बाँडफाँट र आदानप्रदानले नै समृद्ध र खुसी समाज बनाउँछ भन्ने निष्कर्ष हो’, गिरीले भने।

हाल संयुक्त राज्य अमेरिका, भारत र नेपालमा गरी करिब ३० कर्मचारीले सगुनमा काम गरिरहेका छन्। सगुन समूहले फेसबुकमा नभएका धेरै विशेषता ल्याएको छ।

सगुनभित्र छिरिसकेपछि बायाँ भागमा ‘टु-डु लिस्ट’ देखिन्छ, जहाँबाट प्रयोगकर्ताले आफूले गर्नुपर्ने कामलाई सेयर गर्न सक्नुहुन्छ। बीचमा अरूले हेर्न नमिल्नेगरी म्यासेजिङको व्यवस्था गरिएको छ भने दायाँ भागमा बिनाशब्द अरूको मुड परिवर्तन गर्न सकिने ‘मुड टल्क’ सेवा छ।अन्नपूर्ण पोस्ट बाट