शुक्रबार, साउन १५ २०७८
काठमाडौं १२:२४
वासिङटन डिसी 02:39

पेट्रोल लिन ट्याङ्करसहित प्रतिनिधिमण्डल केरुङ प्रस्थान

इनेप्लिज २०७२ कार्तिक १३ गते ५:४४ मा प्रकाशित

काठमाडौँ, १३ कात्तिक । चीनबाट प्राप्त हुने अनुदानको पेट्रोल लिन सीमा नाका केरुङतर्फ नेपाल आयल निगमको नेतृत्वमा एक प्रतिनिधि मण्डल प्रस्थान गरेको छ ।

चीनले अनुदानस्वरुप उपलब्ध गराउन लागेको पेट्रोल शनिबार साँझसम्म नेपाल–चीनको केरुङ नाकामा आइपुग्ने भएपछि पेट्रोल लिन १२ वटा ट्याङ्करसहित आज बिहान निगमका प्रवक्ता दीपक बरालसहितको टोली त्यसतर्फ प्रस्थान गरेको हो ।

चीनले नेपाललाई अनुदानमा उपलब्ध गराउन लागेको एक हजार टन (१३ लाख लिटर) पेट्रोलको पहिलो ‘लट’ शनिबार केरुङ आइपुग्न लागेको हो ।
ल्हासास्थित महावाणिज्यदूत हरि बस्यालले चीन सरकारबाट उपलब्ध गराउन लागिएको पेट्रोल जतिसक्दो चाँडो नेपाल पठाउन आग्रह गरेअनुसार चिनियाँ पक्षले शनिबार केरुङ पु¥याउन लागेको जानकारी दिनुभयो ।

भारतको अघोषित नाकाबन्दीका कारण चर्को इन्धन सङ्कट भएपछि विकल्पका रुपमा सरकारले चीनबाट आयात गर्न लागेको हो । पहिलो लटमा उपलब्ध गराउने पेट्रोल लिन १२ हजार लिटर बोक्ने १२ वटा ट्याङ्कर केरुङ गएको निगमका प्रवक्ता दीपक बरालले राससलाई जानकारी दिनुभयो ।

उहाँका अनुसार शनिबार नै नेपाली ट्याङ्कर ‘लोड’ हुनेछन् । सो टोलीमा सहभागी नेपाल पेट्रोलियम ढुवानी व्यवसायी महासङ्घका महासचिव विश्वप्रसाद अर्यालका अनुसार १२ वटा ट्याङ्करले पहिलो लटमा एक लाख दुई हजार लिटर पेट्रोल ल्याउनेछ ।

टोलीमा नेपाल पेट्रोलियम ढुवानी व्यवसायी महासङ्घका अध्यक्ष खगेश्वर बोहरा र महासचिव अर्याल, नेपाल पेट्रोलिय डिलर्स एसोसिएसनका अध्यक्ष लीलेन्द्र प्रधानसमेत सहभागी हुनुहुन्छ ।

प्रतिक्रिया