बर्दिबास नगरपालिका–१ मा विगत पाँच दिनदेखि पार्किङ गरी राखिएको जनकपुर–जलेश्वर–काठमाडौँ चल्ने ना.५ख४९९४, गौशाला–सम्सी–काठमाडौँ चल्ने ना.५ख२६९४ नम्बरको बस र एउटा अनटेस्ट बस गरी तीनवटा बसमा गएराति ११ः२० बजे अज्ञात समूहले आगजनी गरी क्षति पुर्‍याएको इलाका प्रहरी कार्यालय बर्दिबासका प्रहरी निरीक्षक चन्देश्वर यादवले बताउनुभयो ।

बर्दिबासको भोला वसन्त चौकदेखि (हाईवे) भन्दा तीन सय मिटर उत्तरमा पार्किङ गरी राखिएको ती बसमा आगजनी भएपछि ना.५ख ४९९४ र अनटेस्ट बस पूर्ण रुपमा क्षतिग्रस्त भएको छ भने ना.५ख२६९४ नम्बरको बसमा आंशिक क्षति भएको प्रहरीले जनाएको छ ।

आगजनी गरिएका तीनवटै बस महोत्तरीको औरही गाविस निवासी मुकेश चौधरीको रहेको प्रहरी निरीक्षक यादवले बताउनुभयो । बर्दिबासस्थित आफ्नो डेरामा सुतिरहेका गाडी धनी चौधरीले अचानक डेरा अगाडि आगोको मुस्लो देख्दा बाहिर आएर हेर्दा गाडी जलिरहेको पाएपछि प्रहरीलाई खबर गरेको बताउनुभयो ।

खबरपछि तत्काल त्यहाँ पुगेका प्रहरी र स्थानीयवासीले गाडीको आगो नियन्त्रणमा लिए पनि त्यतिबेलासम्म बस क्षतिग्रस्त भइसकेको थियो । इलाका प्रहरी कार्यालय बर्दिबासले बसमा आगजनी गर्ने समूहको खोजीका लागि गएरातिदेखि व्यापक रुपमा प्रहरी परिचालन गरिसकेको जनाएको छ ।