शुक्रबार, असार ४ २०७८
काठमाडौं ०९:१७
वासिङटन डिसी 23:32

महिलाले चन्दा सङ्कलन गरेर मलामी विश्रामगृह र शवदाह स्थल निर्माण

इनेप्लिज २०७२ भदौ ५ गते ४:०४ मा प्रकाशित

तुलसीपुर (दाङ), ५ भदौ । तुलसीपुरनगरपालिका–१० का महिलाले चन्दा सङ्कलन गरेर मलामीका लागि विश्रामगृह र शवदाह स्थल निर्माण गरी दिएका छन् ।

स्थानीय पुष्पाञ्जलि महिला समूहमार्फत उनीहरुले तुलसीपुरस्थित पातुखोलामा रहेको विष्णुघाटमा रु १० लाखको लागतमा मलामी विश्रामगृह र शवदाह स्थल निर्माण गरेका हुन् । सो वडाका २० जना महिलाले पुष्पाञ्जलि महिला समूह गठन गरी उक्त कामको सुरुवाता तीन वर्ष पहिले गरेका हुन् ।

यसका लागि महिलाले स्थानीय व्यापारी, बुद्धिजीवी, सरकारी निकाय, सङ्घ संस्थालगायतका स्वच्छिक चन्दा सङ्कलन अभियान सञ्चालन गरेका थिए ।

मलामी विश्रामगृह र शवदाह स्थल निर्माण समितिका संयोजक एवम् पुष्पाञ्जलि महिला समूहकी अध्यक्ष सुशीला भट्टराईले आफूहरुले विगत तीन वर्षदेखि थालेको उक्त काम अहिले सम्पन्न भएको बताउनुभयो ।

यो अभियानमा तपाईहरु खास लाग्नुको कारण केहो त भन्ने राससको जिज्ञासामा संयोजक भट्टराइले भन्नुभयो “गाउँमा कसैको मृत्यु भएमा स्थानीय पातुखोलामा जहाँँपायो त्यही लगेर दाहसंस्कार गरिने, खोलाको पानीमा दाउराका कोइला बगेर पानी फोहर हुने र मलामीले पनि घामपानीको सास्ती खेप्नुपरेको देखेपछि भित्रैदेखि मलामीका लागि विश्रामगृह र शवदाह निर्माण गरौं भन्ने सोच आयो र सोहीअनुरुप कामको थालनी गर्‍यौँ । यो सामाजिक काम पनि भएकाले चन्दा दिनेले पनि निकै खुसी भएर दियो । ”

प्रतिक्रिया