बाढीले बेल्डाँडी–बेलौरी जोड्ने पुल बगाँउदा सो क्षेत्रका विद्यार्थी समस्यामा परेका हुन् । पुल बगेपछि खोलामा बाढी आएका बेला विद्यार्थीले घरमै बस्नुपर्ने अवस्था सृजना भएको सरस्वती माध्यमिक विद्यालयका प्रधानाध्यापक विष्णुबहादुर सिंहले बताउनुभयो ।

खोलामा रहेको पुल बगेपछि २५० भन्दा बढी विद्यार्थी प्रत्यक्ष मर्कामा परेको उहाँले भन्नुभयो । पक्की पुल निर्माणका लागि गाविस, जिविस लगायतका निकायमा पुगे पनि पुल निर्माण हुन नसक्दा बालबालिकालाई विद्यालय पढाउनबाट वञ्चित हुनुपर्ने अवस्था आएको विद्यालय व्यवस्थापन समितिका अध्यक्ष दीर्घबहादुर शाहले बताउनुभयो ।

बगाएको पुल निर्माणका लागि विद्यालयले सामुदायिक वनलगायत यहाँका निकायसँग समन्वयको प्रयास गरिरहेको जनाए पनि लगातारको वर्षाका कारण पुल निर्माणको कार्य अगाडि बढ्न सकेको छैन । बेल्डाँडी–९ र बेलौरी नगरपालिका–१२ का स्थानीयवासीले समेत सो स्थानमा पुल नभएका कारण समस्या खेप्दै आएका छन् ।