साना तथा ठूला सवारीसाधनमा सिट सङ्ख्याभन्दा बढी यात्रु बोक्नेमाथि कारबाही गर्न थालेपछि क्षमताभन्दा बढी यात्रु बोक्ने क्रम रोकिएको पाल्पाका प्रहरी नायब उपरीक्षक सुमनकुमार तिमिल्सेनाले बताउनुभयो ।

जिल्लाका ग्रामीण तथा सहरी क्षेत्रमा सञ्चालित सवारीसाधनमा क्षमताभन्दा बढी यात्रु बोक्दै आएका थिए । सिट सङ्ख्याभन्दा बढी यात्रु बोकेर यात्रा गर्ने सवारीचालकमाथि सवारीचालक अनुमतिपत्रमा प्वाल पारिदिने गरेकाले सिट सङ्ख्यामा मात्र यात्रु बोक्न थालेका हुन् ।
पहिलोपटक जरिवाना गर्ने र पटकपटक अटेर गरेमा अनुमतिपत्रमा नै प्वाल पारीदिन थालेपछि पाल्पाका सवारीसाधनले सिट सङ्ख्याभन्दा बढी यात्रु बोक्न छोडेका हुन् ।

प्रहरीले क्षमताभन्दा बढी यात्रु बोकेपछि सडकसडकमा निगरानी अभियान सञ्चालन गरेको छ । निगरानी अभियानसँगै सवारीचालकले क्षमताभन्दा बढी यात्रु बोक्न छाडेका हुन् । सिट सङ्ख्या पूरा भएपछि बीच बाटो यात्रु चढाउन पनि छाडेका छन् । जसले गर्दा दुर्घटनामा कमी र दुर्घटना भए पनि मानवीय क्षतिमा समेत कमी आएको जिल्ला प्रहरी कार्यालय पाल्पाको दाबी छ ।