असारको दोस्रो हप्तादेखि साउनको अन्तिमसम्म पाटनमा फैलिएको प्रकोपबाट दर्जनाँै भेडाबाख्रा मरेका हुन् ।

रोकायगाउँ गाविस वडा १, २ र जुम्ला जिल्लाको संयुक्त पाटनमा भेडा राखिएको स्थानमा पातलो मल मूत्र भएको प्रकोप फैलिएर दर्जनाँै भेडा मरेको रोकायगाउँ–१ का जयबहादुर रोकायले बताउनुभयो । यो क्षेत्रका किसानको मुख्य पेसा नै पशुपालन भेडा र बाख्रा रहेको छ । रोकायले आफ्नो मात्र ३० वटा, तुलबहादुर रोकायका २५ वटा, दलजीत महरका २४ र लालबहादुर रोकायका २२ वटा भेडा उक्त रोगले मरेको जानकारी दिनुभयो ।

जिल्लाको उत्तरी भेकमा रहेको उक्त पाटनमा फैलिएको प्रकोपले निकै ठूलो सङ्ख्यामा बाख्रा, भेडाको क्षति भएको सूचना प्राप्त भएपछि प्राथमिक उपचार लागि चाहिने औषधि र उपकरणसहित पशु प्राविधिकलाई पठाइसकेको जिल्ला पशुसेवा कार्यालय प्रमुख डा गुरुप्रसाद खकुरालले जानकारी दिनुभयो ।

त्यसैगरी साउन १ गतेदेखि ३२ गतेसम्म परेको अविरल वर्षाले जिल्लाका विभिन्न ठाउँमा आएको बाढीपहिरोबाट ६४ पशुचौपाया मरेको प्रहरी नायब उपरीक्षक दानबहादुर मल्लले बताउनुभयो ।

साथै जिल्लाका विभिन्न स्थानमा ७९ रोपनी जग्गामा रहेको अन्नबालीलाई बाढीपहिरोले नष्ट गरेको जिल्ला प्रहरी कार्यालयको सूचना विभागले जनाएको छ ।