बीचमै विद्यालय छाडेका एक सय अन्ठान्नब्बे बालबालिका विद्यालय भर्ना

कञ्चनपुर, १३ साउन । सामाजिक क्षेत्रमा क्रियाशील ब्याकवार्ड सोसाइटी एजुकेसन (बेस) कञ्चनपुरले विद्यालय शिक्षा पूरा गर्न नसकी बीचमै विद्यालय छाडेका मुक्त कमैयाका १९८ बालबालिकालाई तयारी कक्षामा समावेश गरी विद्यालय भर्ना गराएको छ ।

जिल्लाका देखतभूली, कृष्णपुर, झलारी, शङ्करपुरलगायतका ठाउँमा नेपाल शिक्षा कार्यक्रमअन्तर्गत तयारी कक्षा सञ्चालन गरी बालबालिकालाई विद्यालय भर्ना गराएको हो । विद्यालय जान नपाएका र बीचमै विद्यालय छाडेका १५ वर्षमुनिका बालबालिकाको तथ्याङ्क सङ्कलन गरी तयारी कक्षामा समावेश गरी कापी, कलम, झोला, विद्यालय पोशाकलगायत निःशुल्क रुपमा उपलब्ध गराई विद्यालय भर्ना गराउने कार्य गरिँदै आएको बेसका कञ्चनपुर संयोजक लालबहादुर बमले बताउनुभयो ।

“विद्यालय भर्नासँगै मुक्त कमैया, श्रमीक बालबालिकाको अध्ययन, विभेद निदान र शैक्षिक गुणस्तरका लागि कार्यसमेत गर्दै आएका छौँ”, उहाँले भन्नुभयो । विद्यालय शिक्षा ग्रहण गर्ने उमेर ढल्केका १८ वर्ष माथिका युवायुवतीलाई जीवनयापन गर्न सहजता प्रदान गर्नका लागि व्यावसायिक तालिम प्रदान गरी आत्मनिर्भर बनाउने कार्यसमेत सुरु गरिएको उहाँले जानकारी दिनुभयो । व्यावसायिक सीपअन्तर्गत सिलाइकटाइ ५८, डकर्मी १६, मोटरसाइकल मर्मत चार, वाइरिङ तीन, ब्युटीपार्लर दुई र कम्प्युटर मर्मत दुई गरी ८५ जनालाई स्वरोजगार तालिम निःशुल्क रुपमा उपलब्ध गराइसकेको उहाँले बताउनुभयो ।