सोमबार, जेठ ९ २०७९
काठमाडौं ०२:२९
वासिङटन डिसी 16:44

बेवारिसे शव व्यवस्थापन गर्न भरतपुर अस्पताललाई समस्या

इनेप्लिज २०७२ साउन १३ गते १:५८ मा प्रकाशित

bharatpur-hospitalचितवन, १३ साउन । जिल्लाको सदरमुकाममा रहेको भरतपुर अस्पतालमा थुप्रिएका शव व्यवस्थापन गर्न जटिल बन्दै गएको छ ।

विभिन्न ठाउँमा हुने दुर्घटना र नदीले बगाएर ल्याउने बेवारिसे शवका कारण अस्पतालमा रहेको शव गृह भरिँदा अस्पताल दुर्गन्धित बनेको छ । स्थायी ठाउँ नहुँदा शव व्यवस्थापन भरतपुर अस्पतालको टाउको दुखाइको विषय बनेको छ ।

अस्पताल विकास समितिका अध्यक्ष विजय सुवेदीका अनुसार एक महिनामा १५ वटाको हाराहारीमा शव सङ्कलन हुने गर्दछ । जिल्लाका जुनसुकै अस्पतालमा आएका दुर्घटनाका मृतकको शव सनाखत गर्न भरतपुर अस्पताल ल्याइन्छ । त्यसका अतिरिक्त नवलपरासी र त्रिशूली, नारायणी र राप्ती नदीमा बेवारिसे रुपमा बगाएर ल्याएका शव प्रहरीले अस्पतालकै शवगृहमा ल्याएर राख्ने गर्दछ । अस्पतालको शव गृहको क्षमता ६ वटाको मात्रै रहेको छ ।

नगरपालिकाका वरिष्ठ इन्जिनियर भरत आचार्य दीर्घकालीन समाधानका लागि सरोकारवाला निकायसँग गम्भीर छलफल गरी समाधान खोजिनुपर्ने भए पनि त्यसो हुन नसक्दा समस्या भएको बताउनुहुन्छ । नियमत सरकारी अस्पतालले चिकित्सक प्रयोग गरी शवपरीक्षण गर्नुपर्ने हुन्छ भने शवको व्यवस्थापन स्थानीय निकायले गर्नुपर्ने हुन्छ ।

पाँच महिनाअघि सम्म स्थानीय जलदेवी सामुदायिक वन क्षेत्रमा शव व्यवस्थापन गरिँदै आएको थियो । सो वनले समेत विरोध जनाएपछि दाहाखानी पुर्‍याएको हो ।

चितवनका प्रमुख जिल्ला अधिकारी विनोदप्रकाश सिंह ऐनले शवको व्यवस्थापन गर्ने जिम्मेवारी स्थानीय गाविस र नगरपालिकालाई दिएकाले त्यसको दीर्घकालीन व्यवस्थापन उनीहरुले नै गर्नुपर्ने बताउनुहुन्छ ।

प्रतिक्रिया