शुक्रबार, असार ११ २०७८
काठमाडौं ०८:३४
वासिङटन डिसी 22:49

जयश्रीपुलमा क्षति भएपछि चितवनमा सयौँ सवारी र यात्रु अलपत्र

इनेप्लिज २०७२ साउन १२ गते ४:४० मा प्रकाशित

रत्ननगर (चितवन), १२ साउन । पूर्व पश्चिम राजमार्गअन्तर्गत गैँडाकोटको जयश्री खोलाको पुलमा क्षति पुगेर यातायात अवरुद्ध भएपछि पूर्वबाट पश्चिम जाने तथा राजधानीबाट पश्चिम नेपाल तर्फ जाने यातायात प्रभावित भएका छन् ।

चितवनको नारायणगढ, आँपटारी र बसपार्कमा सयौँ सवारी र हजारौँ यात्रु सोमबार साँझदेखिनै अलपत्रमा परेको जिल्ला प्रहरी कार्यालय चितवनले जनाएको छ ।

नवलपरासी गैँडाकोटमा रहेको उक्त पुलमा क्षति पुगेपछि यातायात अवरुद्ध हुन पुगेको इलाका प्रहरी कार्यालय गैँडाकोटले जनाएको छ ।

वैकल्पिक मार्ग बनाउने तयारी गरिएको भए पनि अहिलेसम्म काम हुन सकेको छैन । तीन वर्षअघि पनि सोही स्थानमा पुलमा क्षति पुगेकाले मर्मत गरेर सञ्चालनमा ल्याइएको थियो ।

स्थानीयका अनुसार ओभरलोडको गाडीका कारण पुल लच्किएर क्षति पुगेको हो । अहिले सो पुलमा यात्रुलाई पैदल आवागमनमा समेत रोक लगाइएको छ भने सुरक्षाका लागि प्रहरी परिचालन गरिएको छ ।

चितवनको नारायणगढदेखि पोखराबसपार्कसम्मै गाडीका लाइन लागेका छन् । आँपटारीमा समेत गाडी राखिएको प्रहरीले जनाएको छ ।

पश्चिमबाट आएका गाडी जयश्रीपुल पारी नै रहेका छन् । स्थानीयले भनु पुल भाँचिएको बताएका छन् ।

प्रतिक्रिया