सेभ द चिल्ड्रेनको आर्थिक तथा जिल्ला शिक्षा कार्यालयको प्राविधिक सहयोगमा क्लबले ती विद्यालयका शैक्षिक पूर्वाधार निर्माणका लागि आवश्यक शिक्षण सामग्री तथा त्यहाँ अध्यनरतमध्ये अपाङ्गता, अभिभावक नभएका र गरिब परिवारका १०० बालबालिकालाई सहयोग गर्ने जनाएको छ ।

सन् २०१५ देखि २०१८ सम्म सञ्चालन अवधि रहेको एकीकृत परियोजनाअन्तर्गत समेटिएका विद्यालयका शिक्षक, शिक्षिका, प्रधानाध्यापक र विद्यालय निरीक्षकलाई पनि गुणस्तरीय सिकाइ तथा वातावरण सिकाइ उपलब्धिसम्बन्धी अभिमुखीकरण गर्दै आएको क्लबका अध्यक्ष परवेजअलि सिद्धिकी बताउनु भयो ।

परियोजनाअन्तर्गत क्लबले विद्यार्थीको विद्यालय पोसाक, पोसाक सिलाउन नगद रु ४००, एक वर्षका लागि पुग्ने कपी, कलम, ब्यागलगायत सामग्री रहेको छ ।

विद्यालयमा भर्ना हुने तर, आर्थिक कारणले बीचमै विद्यालय छाड्ने सङ्ख्या घटाउने तथा शिक्षाको गुणस्तर अभिवृद्धि गर्ने उद्देश्यले सञ्चालित परियोजनाअन्तर्गत बाल संरक्षण र बालअधिकार तथा सुशासन विषय पनि समेटिएको छ ।

परियोजना जिल्लाको शैक्षिकस्तरलाई उठाउन सफल हुने र विद्यार्थीलाई विद्यालयमा टिकाइ राख्न कोसेढुङ्गा सावित हुन सक्ने नेपाल राष्ट्रिय निमाविकी प्रधानाध्यापिका ललिता उपाध्यायले बताउनु भयो ।
परियोजनाअन्तर्गत आइतबार क्लबले जिल्लाका १७ मदरसा र दुई विद्यालयलाई रु १६ हजार बराबरको शिक्षण सामग्री उपलब्ध गराएको छ ।