इनेप्लिज
२०७२ साउन १ गते १:४१ मा प्रकाशित
बाबियाचौर (म्याग्दी), १ साउन । विद्यार्थी परिचालन गरेर यस वर्ष म्याग्दीका छ हजारभन्दा बढी निरक्षरलाई साक्षर बनाइएको छ ।
कक्षा ९ र १० का विद्यार्थीलाई परिचालन गरेर १५ देखि ६० वर्ष उमेर समूहका निरक्षरलाई अङ्क, अक्षर चिन्न, लेख्न र पढ्न सक्ने बनाएको जिल्ला शिक्षा कार्यालयले जनाएको छ । साक्षर नेपाल कार्यक्रमअन्तर्गत विद्यार्थीले आफ्नो परिवारका सदस्य तथा छिमेकमा रहेका निरक्षरलाई साक्षर बनाएका हुन् ।
अभियानमार्फत यस वर्ष छ हजार ३६ निरक्षरलाई साक्षर बनाएको कार्यालयका विद्यालय निरीक्षक टेकप्रसाद पाण्डेले जानकारी दिनुभयो । माध्यमिक तहमा अध्ययनरत पाँच हजार १५ विद्यार्थीलाई परिचालन गरिएको थियो । निरक्षर पहिचान गरी उनीहरुलाई साक्षर बनाएबापत विद्यार्थीलाई स्वास्थ्य, जनसङ्ख्या तथा वातावरण विषयको २५ अङ्कको प्रयोगात्मक परीक्षाअन्तर्गत १० अङ्क प्रदान गर्ने व्यवस्था रहेको छ ।
म्याग्दीमा बसोबास गर्ने एक लाख १३ हजार जनसङ्ख्यामध्ये करिब ७५ प्रतिशत साक्षर रहेका छन् । यसैगरी साक्षर बनिसकेकाको क्षमता अभिवृद्धि गर्न कार्यालयले २२ वटा सामुदायिक अध्ययन केन्द्रमा सञ्चालन गरेको साक्षरोत्तर कक्षाबाट चार हजार ६०० लाभान्वित भएका छन् । साथै १२ केन्द्रमार्फत ४० आयआर्जन समूह गठन गरी आयमूलक कार्यक्रम सञ्चालन गरिएको छ । द्वन्द्वप्रभावित नवसाक्षर महिला बालबालिकाका लागि ११ वटा केन्द्रमार्फत विशेष कार्यक्रम सञ्चालन भइरहेको छ ।
प्रतिक्रिया