दैवी प्रकोप उद्धार तथा राहत समितिका संयोजक तथा काभ्रेपलाञ्चोकका प्रमुख जिल्ला अधिकारी सुदर्शन ढकालको अध्यक्षतामा हिजो धुलिखेलमा बसेको बैठकले पहिरोको उच्च जोखिममा रहेको सात गाविसलाई नेपाल प्रहरी, सशस्त्र प्रहरी र नेपाली सेनाको सहयोगमा स्थानान्तरण गर्ने निर्णय भएको काभ्रेपलाञ्चोकका स्थानीय विकास अधिकारी चिरञ्जीवी तिम्सिनाले जानकारी दिनुभयो ।

उहाँका अनुसार सडक पुगेको स्थानमा नेपाल प्रहरी, सशस्त्र प्रहरी र सडक नपुगेको स्थानका बस्ती नेपाली सेनाको सहयोगमा स्थानान्तरण गर्न आवश्यक तयारी गर्ने निर्णय भएको छ ।

स्थानीय विकास अधिकारी तिम्सिनाका अनुसार नाग्रेगर्चचे गाविसको वडा नं १ २ ३ का १४२ घरलाई ५ नं वडाको पलाकथन भन्ने स्थानमा, पोखरीचौरी गाविसको ५० घरलाई वडा नं ६ को स्थानमा, ९ नंको ४७ घरलाई दारेगौडा भन्ने स्थानमा, च्याम्रेङबेँसीको १ २ ३ र ७ नं वडाको ९३ घरधुरीलाई सोही गाविसको विभिन्न ठाउँमा, बोल्देफेदिचे गाविसको वडा नं ८ को ८० घरलाई व्यक्तिगत जग्गामा स्थानान्तरण गरिने छ ।

त्यस्तै पोखरी नारायणस्थानको वडा नं ३ र ४ को ६४ घरलाई सोही वडाकै जग्गामा, शिखरआम्बोटेको ६५ घरलाई नजिकैको स्थानमा र सिसाखानी गाविसको ३२ घरधुरी स्थानान्तरण हुने उहाँले जानकारी दिनुभयो ।

यो अस्थायीरुपमा केही महिनाका लागि हो तर पछि उहाँहरु आफ्नै स्थानमा जानुहुन्छ स्थानीय विकास अधिकारी तिम्सिनाले भन्नुभयो ।

उहाँले बस्ती सार्नका लागि राजनीतिक दल सम्मिलित टोली गाउँगाउँ पुगेर स्थलगत अध्ययन गरेर बुझाएको प्रतिवेदनका आधारमा बस्ती स्थानान्तरण हुन लागेको जानकारी दिनुभयो ।

स्थाविअ तिम्सिनाले पहिलो चरणमा ती गाविस र अर्को चरणमा जोखिममा रहेका अन्य गाविसमा समेत बस्ती स्थानान्तरण हुने बताउनुभयो ।