इनेप्लिज
२०७२ जेठ २८ गते ४:५० मा प्रकाशित
पाँचथर, २८ जेठ । ताप्लेजुङको पश्चिमी क्षेत्रका विभिन्न गाविसमा बुधबार साँझदेखि परेको वर्षासँगै गएको पहिरोमा परी हालसम्म १२ जनाको मृत्यु भएको छ ।
आठ जना गम्भीर घाइते भएका छन् । मृतकमध्ये लिङ्तेपका चमेली लिम्बू र मनमाया लिम्बू, लिवाङका देवेन्द्र लिवाङ, खोक्लिङका सविन मादेन र वसन्त विकको मात्र सनाखत भएको छ ।
ताप्लेजुङका लिबाङ, थोक्लिङ, थिङलाबु र लिङ्केत गाविसको सबै वडामा एकै पटक भीषण पहिरो जाँदा उनीहरूको मृत्यु भएको हो ।
यी गाविसबाट अझै केही स्थानीय सम्पर्कमा नआइसकेकाले मृतकको सङ्ख्या अझै बढ्न सक्ने प्रहरीको अनुमान छ । खामलुङ गाविसका केही वडामा पनि पहिरो गएको छ ।
मृत्यु भएकामध्ये पाँच जनाको शव थिङलावुबाट, दुई जनाको शव खोक्लिङबाट, दुई जनाको शव सान्थाक्राबाट, एक जनाको शव लिबाङबाट र दुई जनाको शव लिङथेपुबाट निकालिएको प्रहरीले जनाएको छ ।
पश्चिमी ताप्लेजुङका ६ गाविसका खोला आसपास र डाँडामा रहेका दुई दर्जनभन्दा बढी घर पहिरोले बगाएको हो ।
पहिरोले लिङ्तेप, खोक्लिङ, लिवाङ र थिङलावु गाविस सबैभन्दा बढी प्रभावित भएका छन् ।
वर्षा भइरहेको र खोल्सा तथा खोला बढेका कारण उद्धारमा समेत कठिनाइ भएको जिल्ला प्रहरी कार्यालय ताप्लेजुङले जनाएको छ ।
उद्धारका लागि काठमाडौँबाट समेत सेनाको हेलिकप्टर ताप्लेजुङ गएपनि खराब मौसमको कारण घटनास्थल पुग्न सकेको छैन ।
स्थानीय प्रहरी र स्थानीय सर्वसाधारण अहिले प्रभावित स्थानमा उद्धारमा खटिएका छन् ।
गएराति पौने १२ बजे ताप्लेजुङको म्याङखामा पनि पहिरो जाँदा मेची राजमार्ग अवरुद्ध बनेको छ ।
प्रतिक्रिया