इनेप्लिज
२०७२ जेठ १६ गते १५:५१ मा प्रकाशित
ललितपुर, १६ जेठ । तरुण भूकम्पपीडित सहयोग तथा पुनःस्थापनाको अगुवाइमा १६ वटा अस्थायी बासस्थानको निर्माण गरिएको छ ।
गोदावरी नगरपालिकाभित्र पर्ने बडिखेल, गोदावरी, विशङ्खुनारायण, गोदामचौर र ठैवमा २५ वटा अस्थायी टहरा निर्माण गरिने नगर क्षेत्रका तरुण दल युवा समन्वय समितिका संयोजक वशिष्ठ अधिकारीले बताउनुभयो । उक्त समितिमा ७० जना तरुण युवाको सहभागिता रहेका छन् ।
यसरी निर्माण गरिएका टहरामा अपाङ्गता, विपन्न वर्ग तथा एकल महिलाका परिवारका लागि भएको संयोजक अधिकारीले उल्लेख गर्नुभयो ।
हालसम्म निर्माण गरिएका टहरामा १६ परिवारले बसोवास भइसकेको उहाँले बताउनुभयो ।
तरुण कार्यदलका संयोजक मङ्गल तामाङले प्रत्येक टहरामा दुईवटा कोठा भएको बताउनुभयो । उक्त टहरा निर्माणमा स्थानीय तहमा पाइने बाँस तथा काठको अधिक प्रयोग गरिएको उहाँले उल्लेख गर्नुभयो ।
हालसम्म बडिखेलमा पाँच, गोदावरीमा छ, ठैवमा एक, गोदामचौरमा दुई र विशङ्खुनारायणमा दुईवटा गरी १६ वटा टहराको निर्माण भइसकेको संयोजक तामाङले बताउनुभयो ।
प्रतिक्रिया