आइतबार, साउन १७ २०७८
काठमाडौं ०७:०६
वासिङटन डिसी 21:21

भूकम्पपीडित परिवारका लागि मेचीनगरवासीले घर निर्माण गरिदिने

इनेप्लिज २०७२ जेठ १३ गते १:१२ मा प्रकाशित

सुरुङ्गा (झापा), १३ जेठ । मेची उद्योग वाणिज्य सङ्घले सिन्धुपाल्चोकका भूकम्पपीडित १५० परिवारका लागि घर निर्माण गर्ने भएको छ ।

दाताहरुको सहयोगमा मेची नगरवासीले सञ्चालन गरेको ‘मेची अभियान’मार्फत रु २२ लाख ५० हजारको लागतमा घर निर्माण गर्न लागिएको सङ्घ मेचीनगरका अध्यक्ष एवम् अभियानका संयोजक विजय डालमियाले बताउनुभयो ।

उहाँका अनुसार जिल्ला प्रशासन कार्यालय सिन्धुलीसँग सहकार्य गर्दै अतिप्रभावित क्षेत्रमा गएर घर निर्माण गरिने छ । जसका लागि ५० जनाभन्दा बढी स्वयम्सेवी परिचालन गरिने छ ।

यसैबीच भारत, भुटान बङ्गलादेशसहित अन्य राष्ट्रबाट राहत सङ्कलन भइरहेको र सङ्कलित राहतमध्ये रु सात लाख जिल्ला दैवीप्रकोप उद्धार समिति झापालाई हस्तान्तरण गरिएको छ भने छ वटा प्रभावित क्षेत्रमा पुगेर करिब रु ७० लाख बराबरको जिन्सी सामग्री वितरण गरिसकेको संयोजक डालमियाले बताउनुभयो ।

पीडितका लागि घर निर्माण आगामी हप्ताबाट सुरु गरिने बताइएको छ ।

प्रतिक्रिया