भूकम्पका कारण धेरै मानिस काठमाडौँ उपत्यका छाडेर जानु यसको प्रमुख समस्या भएको जनाइएको छ । यस बाहेक भूकम्पले प्रभावित नभएका क्षेत्रमा सुरक्षित बासस्थानका लागि केही मानिसले अस्थायी रुपमा जानु पनि अर्को कारण हो । दैनिक रुपमा उत्पादित दुग्ध सेवन गर्ने उपभोक्तामा कमी आएकाले बजारमा दूध बिक्री गर्न समस्या भएको जिल्ला दुग्ध उत्पादक सहकारी सङ्घका अध्यक्ष रामप्रसाद आचार्यले बताउनुभयो । भूकम्पका कारण कृषकले धेरै लैनो गाईभैंसी गुमाउनु परे पनि बाँकी रहेका गाईभंैसीबाट उत्पादन भएको दूधलेसमेत बजार पाउन मुस्किल भएकोमा उहाँले दुखेसो व्यक्त गर्नुभयो ।

उत्पादन भएका दूधलाई व्यवसायीले लिन आनाकानी गरेको गुनासो दुग्ध कृषकको रहँदै आएको उहाँको भनाई छ । यसरी दूध लिन नमानेका व्यवसायीलाई पछिल्लो समयमा आवश्यक परेको दूध ल्याउन नसकिने भन्दै जबर्जस्ती दूध बिक्री गर्नुबाध्यता भएको उहाँको भनाई छ । उत्पादित दूध बजारमा सजिलै बेच्न नपाउँदा कृषकले थप आर्थिक भार व्यहोर्नु पर्छ कि भन्ने चिन्ता थपिएका छन् ।

जिल्लाभरि करिब दैनिक रुपमा ४० हजार लिटर दूधको खपत हुँदैआएको थियो । भूकम्पले पशुचौपाया गुमाउनु परेकोले हाल ३० हजार लिटर दूधको मात्र खपत हुने गरेको छ । कुल दुग्ध उत्पादनमा जिल्लाको दक्षिण भेगमा पर्ने १९ गाविसका स्थानीयवासीलले ७० प्रतिशत हिस्सा ओगट्दै आएका छन् ।

भूकम्पमा परी लैनोभैँसी १३१ र गाई २२ वटा मरेका छन् । प्रतिलैनो भैँसीको मूल्य न्यूनतम रु ८० हजार र प्रतिगाई रु ६० हजार पर्ने गरेको छ ।