नेपाली काँग्रेसका सभापति सुशील कोइरालाको सभापतित्वमा आज बालुवाटारमा बसेको पार्टीको केन्द्रीय पदाधिकारीकोे बैठकले उक्त निर्देशन दिएको हो । “हिमाल–पहाड–तराई योगदान विपत्तिको सामना गर्न हामी गर्छौ श्रमदान” भन्ने मूल नाराका साथ काँग्रेसले भूकम्पबाट कम प्रभावित जिल्ला र गाउँ नगरबाट भूकम्प प्रभावित जिल्लाका गाउँ÷नगर÷वडामा गई श्रमदान गर्न निर्देशन दिएको हो ।

बैठकमा सभापति कोइरालाले श्रमदानको लागि २५÷२५ जनाको प्राविधिक, इञ्जिनियरको टोली खडा गरी भूकम्पप्रभावित जिल्लामा अस्थायी घरटहरा निर्माण गर्न निर्देशन दिनुभयो ।

उपसभापति रामचन्द्र पौडेलले भातृ संस्थाका प्रतिनिधिलाई डाकेर प्रभावित जिल्लाका पार्टीसँग समन्वय गरी श्रमदानमा लाग्न निर्देशन दिनुभयो । टोलीमा गारो लगाउने, काठको काम गर्ने र छाना मिलाउन जान्ने सिपालु ५÷६ जना र अन्य सामान्य श्रम गर्नसक्ने व्यक्तिहरु सम्मिलित गराउने, तोकिएका जिल्ला÷गाउँमा जाने मिति र सम्पर्क व्यक्ति निश्चित गर्ने निर्णय गरिएको छ ।

त्यस्तै सात दिनसम्म तोकिएको गाउँमा गएर लगातार काम गर्ने र त्यहाँका बासिन्दालाई वर्षा धान्न सक्ने भरपर्दाे टहरा वा बासस्थानको व्यवस्था गरेर फर्कनु पर्ने साथै टोलीले श्रम गर्न जाँदा आफूले खाने कुराहरु— दाल, चामल, तरकारी, नून, तेल लगायतका खाद्य सामग्रीहरुको व्यवस्था र बस्ने पाल, लुगाफाटो र भाँडाकुडा सबै साथमा लिएर जानुपर्ने भनिएको छ ।

यस्तै जानुपर्ने जिल्लामा स्थान पहिचानलगायत आवश्यक प्रबन्ध गर्न एक केन्द्रीय सदस्य र श्रम अभियानमा सहभागी जिल्लामा एक केन्द्रीय सदस्य खटिनुपर्ने, साथै पार्टीले केन्द्रबाट जिल्लालाई परिपत्र गरी जिल्ला सभापति, क्षेत्रीय सभापति, नगर सभापति लगायतका स्थानीय नेताहरुलाई टोली गठन गर्न निर्देशन दिएको छ ।

भूकम्पप्रभावित जिल्लामा विज्ञ, प्राविधिक, इञ्जिनियर र स्वास्थ्यकर्मीका लागि इञ्जिनियर एसोसियसन र मेडिकल एसोसियसनसँग सहयोग लिने साथै पार्टीका शुभेच्छुक संस्था नेपाल प्रजातन्त्रवादी इञ्जिनियर्स एसोसिएसन (सिडेन) र प्रजातन्त्रवादी चिकित्सक सङ्घलाई सहयोगका लागि पत्राचार गर्न निर्देशन दिइएको छ ।