कुलो र नहर अतिक्रमण भएपछि त्यहाँ रहेको दुई सय बिगाहा खेतमा सिँचाइ प्रभावित भएको हो ।

स्थानीय कृषकले सिँचाइ बन्द भएपछि खेत बाँझै रहने भन्दै अतिक्रमण गरिएको कुलो र नहरलाई पहिलेकै अवस्थामा फर्काउन पहल थालेका छन् । तर आफूहरुको पहललाई नगरपालिकाले समेत ध्यान नदिएको उनीहरुको गुनासो छ ।

यस क्षेत्रमा जग्गा प्लटिङ गरेका समूहले आफ्नो व्यावसायिक स्वार्थ पूरा गर्ने उद्देश्यले सार्वजनिक कुलो अतिक्रमण गरी सडक निर्माण गरेको स्थानीयको गुनासो छ ।

सयौँ वर्ष पुरानो सार्वजनिक कुलोमा सडक बनाएर किसानलाई सिँचाइबाट बञ्चित गरिएको स्थानीय कृषक नरबहादुर कोइरालाले गुनासो गर्नुभयो । विसं २०२८ देखि बबनी, कोटिहवा र मधौलिया गरी तीन मौजाले सिँचाइ गर्दै आएको कुलोबाट मधौलिया क्षेत्रको करिब दुई सय बिगाहा क्षेत्रफलमा सिँचाइ हुँदै आएको छ ।

सार्वजनिक कुलो र ३० फिट गहिरो नहर रहेको सो क्षेत्रमा केही वर्षअघि भैलुभुजा सिँचाइ प्रणालीले बोरिङ गाडेपछि नहर बन्द भएको थियो । नहरमा पानी आउन बन्द भएपछि किसानले सार्वजनिक कुलोमार्फत खेतमा सिँचाइ गर्दै आएका थिए ।

कुलोनै मेटाएर सडक बनाइएपछि मधौलिया डुबानमा पर्ने र खेती गरेर जीविका चलाउँदै आएका किसान विस्थापित हुने अवस्था आएको किसानहरुको भनाइ छ ।