चितवन दारेचोक–७, ८ र ९ मा बसोबास गरिरहेका चेपाङ समुदायले त्रिपाल नपाएको गुनासो आएपछि प्रभु समूहले जिल्ला प्रशासन कार्यालय चितवनको समन्वयमा राहत सामग्री वितरण गरेको समूहकी उपाध्यक्ष कुशुम लामाले जानकारी दिनुभयो ।

उहाँले पहुँच भएकाले धेरै राहत पाएको र पहुँच नभएकाले राहत पाउन नसकेको गुनासो बढेका कारण आफ्नो व्यावसायिक समूहले चितवनको विकटमा बसोबास गर्ने चेपाङ बस्तीमा १५० थान त्रिपाल वितरण गरेको बताउनु भयो ।

चितवनस्थित दारेचोक गाविसका केही वडा अत्यन्तै विकट मानिन्छन् । ती वडामा बसोबास गर्दै आएका चेपाङ समुदायलाई वितरण गरिएको राहतले सहयोग पुग्ने बताइएको छ । सो समूहले सामाजिक उत्तरदायित्व बहन गर्ने उद्देश्यले विभिन्न स्थानमा सामाजिक कार्य गर्दै आएको छ ।

यसैबीच, बुद्ध लाइक इन्टनेसनल एसोसिएसनले धर्मस्थलीका भूकम्पपीडितलाई आइतबार रु २५ लाखको राहत वितरण गरेको छ ।

एसोसिएसनको नेपाल च्याप्टरले २७० सिल्पिङ ब्याग, सोही सङ्ख्यामा म्याट तथा रु २० लाखको टेन्ट उपलब्ध गराएको हो । धर्मस्थली–१, २ र ३ का स्थानीयवासीलाई भूकम्पपछि सुत्न, बस्न समस्या परेपछि श्री कुुमारी सेवा समिति भक्तजन परिवार र तता के पूचःको सहकार्यमा दिइएको हो ।

एसोसिएसनको नेपाल च्याप्टर अध्यक्ष देवकाजी शाक्यले भूकम्पले राष्ट्रिय विपत्ति आएको हुँदा मानवीय सहयोगलाई प्राथमिकतामा राखेर सहयोग उपलब्ध गराउनुपर्नेमा जोड दिनुभयो । समाजसेवी रमेशमान मुनिकारले सरकारले उनीहरुलाई अविलम्ब पुनःस्थापनाको योजना ल्याउनुपर्ने विचार व्यक्त गर्नुभयो ।