भूकम्प आएको एक हप्ता हुँदासमेत राजधानी काठमाडौँबाट सबैभन्दा नजिक रहेको स्थान साँखुमा विभिन्न सङ्घसंस्था तथा व्यक्तिहरूले केही मात्रामा राहत वितरण गरेता पनि अहिलेसम्म सरकारका तर्फबाट राहत सामग्री त्यहाँ नपुगेको स्थानीयवासीको भनाइ छ ।

स्थानीयवासी पवनलाल श्रेष्ठले भन्नुभयो, ‘विभिन्न सङ्घसंस्थाले केहीमात्रामा त्रिपाल र खानेकुरा वितरण गरेपनि सरकारका तर्फबाट अहिलेसम्म केही पाएका छैनौँ ।”

यसैगरी दिल्ली सिक गुरू नामक गैरसरकारी संस्थाले साँखुका भूकम्प पीडितलाई दश दिनसम्म दुई छाक खाना खुवाउने भएको छ । त्यसैगरी साँखु जेसिसको पहलमा एकसय सोलार बत्ती वितरण गरिएको स्थानीयवासी श्रेष्ठले जानकारी दिनुभयो ।

भूकम्पबाट साँखुमा मात्र ६२ जनाको मृत्यु भएको छ । शङ्खरापुर नगरपालिकामा करिब एकसयको मृत्यु भएको छ । त्यसैगरी तीनसयभन्दा बढी घाइते भएका छन् ।

जहरसिंह पौवा, पालुबारी, खुमलटार, सानो गाउँ र घुमारी चोकलगायत क्षेत्रमा करिब ९० प्रतिशत घर क्षतिग्रस्त भएको श्रेष्ठको भनाइ छ । उद्धारमा नेपाली सेना र प्रहरी खटिएका छन् ।