बिहीबार, मंसिर ११ २०७७
काठमाडौं ०२:०८
वासिङटन डिसी 15:23

मध्यपहाडी खण्डमा बीस किलोमिटर सडक कालोपत्रे सुरु

इनेप्लिज २०७२ वैशाख ७ गते ४:०६ मा प्रकाशित

Baglung_district_locationबलेवा (बागलुङ), ७ वैशाख । राष्ट्रिय गौरवको आयोजना मध्यपहाडी लोकमार्गको बागलुङ खण्डमा कालोपत्र गर्ने काम सुरु भएको छ । लोकमार्गको घोडावाधेदेखि हटियासम्मको करिब २० किलोमिटर सडक कालोपत्र गर्न सुरु गरिरएको हो ।

लोकमार्ग घोडावाधे–हटियो खण्डको २० किलोमिटर सडक कालोपत्र करिब रु ४५ करोडको लागत स्टिमेट निकालेको मध्यपहाडी लोकमार्गका इन्जिनियर तिलक सुब्बाले बताउनुभयो ।

सुब्बाका अनुसार चालु आर्थिक वर्षमा नै सडक कालोपत्र गरिसक्न उक्त सडकलाई दुई खण्डमा विभाजन गरिएको छ । कालोपत्रको जिम्मा लुम्बिनी एपेक्स जेवी प्रालि र हिमदुङ एन्ड थोकर कम्पनीले पाएका छन् । हिमदुङ एन्ड थोकर कम्पनीले निर्माण कार्यमा केही ढिला गरेका कारण उसलाई सचेत गराइएको सुब्बाले बताउनुभयो ।

“चालु आर्थिक वर्षमा नै लोकमार्गको बागलुङ खण्डमा २० किलोमिटर पिच गर्ने योजना छ”–सुब्बाले भन्नुभयोे–“पहिलो चरणमा १० किलोमिटर सडक कालोपत्र गर्न सुरु भएको छ ।”
काममा ढिलाइ भएको भनिएको १० किलोमिटर सडकमा पूर्वाधार भने तयार गरिएको छ । चिप्स गिट्टी बिच्छ्याएर पेल्न बाँकी रहेको निर्माण कम्पनीले जनाएको छ । लोकमार्गको हटियादेखि बुर्तिवाङसम्म ४३ किलोमिटरमा कालोपत्र गर्न पूर्वाधार विकासको काम भइरहेको छ । उक्त सडक खण्डमा पनि करिब रु ७६ करोडको लागतमा ठेक्का दिएर काम सुरु भएको मध्यपहाडी लोकमार्गका डिभिजन इन्जिनियर रोहितकुमार विसुरालले बताउनुभयो ।

प्रतिक्रिया