पाँचथर र इलामको सीमावर्ती गाविस रविमा विगत लामो समयदेखि अहिलेसम्म कर्मचारी नहुँदा अहिले स्वास्थ्य केन्द्र अहेव, अनमी र कार्यालय सहयोगीको भरमा चल्दै आएको छ ।

एउटा चिकित्सकसहितको दरबन्दी रहेको सो स्वास्थ्य केन्द्रमा नियुक्ति लिएर आएका चिकित्सक गजेन्द्र दास अहिलेसम्म कार्यालयमा उपस्थित नभएको स्वास्थ्य केन्द्रका वरिष्ठ अहेव भूपेन्द्रप्रसाद मण्डलले जानकारी दिनुभयो ।

उहाँले भन्नुभयो, “यस स्वास्थ्य केन्द्रमा चिकित्सकसहित १३ जनाको दरबन्दी भए पनि अहिले दुई जना अहेव, तीन जना अनमी र तीन जना कार्यालय सहयोगीको भरमा स्वास्थ्य केन्द्र चल्दै छ ।” उहाँका अनुसार यस स्वास्थ्य केन्द्रमा पाँचथर जिल्लाका १७ र इलामका आठ वटा गाविसका सेवाग्राहीले सेवा लिँदै आएका छन् ।

चिकित्सक दास अहिले अध्ययनका लागि भन्दै वीरअस्पताल काठमाडौँमा काजमा काम गर्दै आएका छन् ।