गुर्जा, मुना, मुदी, लुलाङ र मराङ गाविसका सामुदायिक विद्यालयमा गठन भएका बाल क्लबले बालविवाहविरुद्ध सक्रियता देखाएका हुन् । सानै उमेरमा विवाह गर्दा बालबालिकाको शैक्षिक, मानसिक र स्वास्थ्यमा पर्ने असरका बारेमा जानकारी गराउन अभियान सुरु गरेको चन्द्र ज्योति मावि मुदी खिवाङको बाल क्लबकी अध्यक्ष बिपना बुढाथोकीले बताउनुभयो ।

क्लबका सदस्यले २० वर्षभन्दा कम उमेरमा विवाह नगर्न विद्यार्थी र समुदायका अभिभावकलाई सचेत गराउन थालेका छन् । विद्यालयमा तहमा पढ्ने किशोरकिशोरीले विवाह गरेर अध्ययनलाई निरन्तरता दिन नसक्ने, अपरिपक्व उमेरमा गरेको विवाह छिट्टै सम्बन्ध विच्छेदमा परिणत हुने र सानै उमेरमा बच्चा जन्माउँदा महिलाको स्वास्थ्यमा नकारात्मक असर पर्ने भएकाले बालविवाह नियन्त्रण गर्न जोड दिएको अध्यक्ष बुढाथोकीले बताउनुभयो ।

पाँचवटा गाविसका १९ वटा सामुदायिक विद्यालयमा गठन भएका सबै बाल क्लबले बालविवाहलाई प्रमुख शैक्षिक, स्वास्थ्य र सामाजिक समस्याका रुपमा चित्रण गर्दै नियन्त्रणका लागि आवश्यक योजना बनाएका छन् । पढ्ने उमेरमा विवाह गर्ने समस्या जटिल रुपमा देखिएकाले त्यसलाई नियन्त्रण गर्न बालविवाहविरुद्ध जनचेतना फैलाउने योजना बनाएको बुद्धिविकास माविमा गठित बाल क्लबका अध्यक्ष टङ्कप्रसाद घर्तीले बताउनुभयो ।

असल छिमेकी नेपालद्वारा सञ्चालित म्याग्दी सामुदायिक विकास परियोजनाले बाल क्लबका पदाधिकारी तथा सदस्यलाई क्षमता तथा नेतृत्व विकाससम्बन्धी तालिम प्रदान गर्नुका साथै चेतनामूलक क्रियाकलाप गर्न सहयोग गर्दै आएको छ । बालअधिकारको संरक्षणका लागि वकालत गर्न तथा प्रतिभा प्रस्फुटन गर्ने र सिर्जनात्मक क्रियाकलाप गर्न सहयोग गरिएको परियोजनाका संयोजक कृष्ण रावतले बताउनुभयो ।