इनेप्लिज
२०७१ चैत २६ गते ३:४० मा प्रकाशित
कञ्चनपुर, २६ चैत । कञ्चनपुरको झलारी पिपलाडी नगरपालिका– ९ सिसैयामा रहेको बृन्दावन सामुदायिक वनले आफ्ना स्वामित्वमा रहेको ताललाई ठेक्कामा दिएर विद्यालयलाई सघाउ पु¥याउँदै आएको छ ।
वनभित्र रहेको तालमा माछापालनका लागि रु ७६ हजार ७७० मा ठेक्का दिएर सामुदायिक वनले दुई वटा विद्यालयको भौतिक निर्माण र फर्निचर निर्माणका लागि खर्च जुटाउने कार्य गर्दै आएको छ ।
अशिग्राम माध्यमिक विद्यालय र मङ्गल प्राथमिक विद्यालयलाई रु ३५ हजारका दरले रकम प्रदान गर्ने व्यवस्था मिलाइएको वनका सदस्य तेजबहादुर सुनारले बताउनुभयो ।
सामुदायिक वनले प्रदान गर्दै आएको रकमबाट फर्निचर निर्माण र भौतिक पूर्वाधारमा लगानी गरिँदै आएको अशिग्राम माध्यमिक विद्यालयका प्रधानाध्यापक भरतबहादुर ऐरले बताउनुभयो ।
रकमसँगै दुवै विद्यालयलाई फर्निचर निर्माणका लागि वनले सालको काठसमेत उपलब्ध गराएको जनाएको छ ।
गत आवदेखि विद्यालयलाई सामुदायिक वनले रकम उपलब्ध गराउने व्यवस्था गरेको हो । सामुदायिक वनभित्र वर्षभरि एकनासको पानी रहने एउटा र वर्षाको पानीले भरिने दुई वटा गरी तीन वटा प्राकृतिक ताल रहेका छन् ।
यसैगरी असहाय, विपन्न परिवारलाई औषधोपचार गर्न र आयआर्जनका लागि सघाउ पुर्याउनका लागि कोष स्थापनाका लागिसमेत कार्य अगाडि बढाइएको सामुदायिक वनका अध्यक्ष मंगरु डगौराले बताउनुभयो ।
वनले घाँस बिक्री, दण्ड जरिवाना, काठ बिक्री, दाउरा बिक्री, ताल ठेक्कामा दिएर आम्दानी गर्दै आएको छ ।
सामुदायिक वनमा ५०० भन्दा बढी उपभोक्ता निर्भर रहेका छन् ।
प्रतिक्रिया