महिला हिंसाका दोषीलाई कारबाही गर्न युवा सङ्घको माग

काठमाडौँ, १८ फागुन । युवा सङ्घ नेपालले मुलुकमा महिला हिंसाका घटना बढ्दै गएकोमा चिन्ता व्यक्त गर्दै त्यस्ता घटनामा दोषीलाई कडा कारबाही गर्न आज गृह मन्त्रालयमा ज्ञापनपत्र बुझाएको छ ।

उपप्रधानमन्त्री तथा गृहमन्त्री वामदेव गौतमसमक्ष सो ज्ञापनपत्र हस्तान्तरण गर्न सङ्घका अध्यक्ष निरु पालसहितका पदाधिकारी मन्त्रालय पुगेका भएपनि गृहमन्त्रीको व्यस्तताका कारण उहाँको सचिवालयमा दर्ता गरिएको हो ।

सङ्घका प्रवक्ता प्रभातविक्रम कटवालका अनुसार महिलाले समाजमा संविधानतः सहज जीवन यापन गर्न र हिडडुल गर्नसमेत नसक्ने अवस्था आउनुले मुलुकका कानुनी राज्य कमजोर भएको देखिएकाले सरकारको ध्यानाकर्षण गराएको हो ।

गृहमन्त्री गौतमसँगको मौखिक कुराकानीमा त्यस्ता घटनामा संलग्न दोषीलाई कडा कारबाही गर्ने प्रतिबद्धता व्यक्त गर्नुभएको थियो । रासस