धूम्रपान र मद्यपान सेवनको वृद्धि तथा रासायनिक मलको प्रयोग गरेका खाद्य वस्तुको प्रयोग बढेसंँगै रोगीको सङ्ख्यामा वृद्धि भएको हो । जिल्ला स्वास्थ्य कार्यालयका अनुसार जिल्लाभरि तीन सय १९ क्षयरोगीका बिरामी छन् । गत आवमा दुई सय २९ मात्रै बिरामी भेटिएकामा यस वर्ष थप ९० जना नयाँ रोगी पत्ता लागेको कार्यालयका क्षयरोग स्रोत व्यक्ति लक्ष्मण केसीले जानकारी दिनुभयो ।
उहाँका अनुसार गत आवमा एक सय २० जनामा पोजेटिभ र एक सय नौ जनामा नेगेटिभ सङ्क्रमित फेला परेकामा चालु आवमा ३४ पोजेटिभ र ५६ नेगेटिभ सङ्क्रमित पाइएको छ । रोगीले लाजले रोग लुकाउने र उपचारका लागि स्वास्थ्य संस्थामा नआउने प्रवृत्तिले पनि रोगीको सङ्ख्या बढ्ने उहाँको भनाइ छ ।
जिल्लाका ४८ स्वास्थ्य केन्द्रबाट क्षयरोगको निःशुल्क औषधि पाइन्छ । स्वास्थ्यकर्मीको प्रत्यक्ष निगारानीमा औषधि सेवन गरेमा निको हुने भए पनि बिरामी औषधि सेवन गर्न स्वास्थ्य संस्थासम्म नआउने भएकाले समस्या बढेको केसीको भनाइ छ ।