यही चैत ९ गते धनुषाको मदन आश्रित निम्नमाध्यमिक विद्यालय, सबैलाको व्यवस्थापन समितिभित्र विवाद बढेपछिको भिडन्तमा स्थानीय रामसेवक राउत र रामप्रकाश यादवको मृत्यु भएको थियो ।

अभिभावक सङ्घ नेपालका अध्यक्ष सुप्रभात भण्डारीले घटना दुःखद्, निन्दनीय र विद्यालय शान्ति क्षेत्र विरोधी भएको भन्दै यसले विद्यालय व्यवस्थापन समितिको गठन विधिमै पुनःविचार गर्नुपर्ने देखाएको बताउनुभयो ।

अध्यक्ष भण्डारीले रासससँग कुरा गर्दै लामो समयदेखि स्थानीय निर्वाचन नहुनु, अस्थायी शिक्षक नियुक्तिको अधिकार व्यवस्थापन समितिलाई दिइनु र विद्यालयको स्रोतमाथि राजनीति दलको आँखा लाग्नुले समस्या निम्तिएको हो भन्नुभयो ।

यस्तै नेपाल सामुदायिक विद्यालय व्यवस्थापन समिति सङ्घका महासचिव मोहन खतिवडाले घटनाको छानबिन भई दोषीलाई कारबाहीे र विद्यालयमा भइरहेको अति राजनीतिकरण अन्त्य हुनुपर्ने माग गर्नुभयो । सङ्घका तर्फबाट पनि घटनाको स्वतन्त्र अध्ययन गरिने उहाँले बताउनुभयो ।