बिहीबार, कार्तिक ६ २०७७
काठमाडौं १४:४८
वासिङटन डिसी 05:03

एक सय युवाले ६८ लाख कृषि अनुदान पाउने

इनेप्लिज २०७१ फागुन २५ गते ८:४६ मा प्रकाशित

Baglung_district_locationबागलुङ, २५ फागुन । जिल्लामा व्यावसायिक कृषि उद्यममा लागेका एक सय युवाले ६८ लाख रुपैयाँ सरकारी अनुदान पाउने भएका छन् ।

कृषि उद्यममा लागेका र विदेशबाट फर्केका बेरोजगार युवाहरुले जिल्ला कृषि कार्यालयबाट व्यावसायिक तरकारीखेती, च्याउखेती र मौरीपालनको लागि अनुदान प्राप्त गर्नेछन् ।

तरकारी खेतीमा ६० जना तथा च्याउखेती र मौरीपालनमा २०/२० जना युवालाई अनुदानको लागि छनोट गरिएको जिल्ला कृषि विकास कार्यालयले जनाएको छ । तरकारीमा ६० जना युवाले ४० हजारका दरले रु २४ लाख र च्याउखेतीमा २० जना युवा कृषकले ४० हजारका दरले अनुदान पाउने वरिष्ठ कृषि विकास अधिकृत विनोद हमालले बताउनुभयो ।

कृषि उद्यममा लागेर स्वरोजगार बन्न चाहने १८ देखि ४५ वर्षका युवाले अनुदान पाउने उहाँले बताउनुभयो । सिताके च्याउका लागि सात र कन्ने च्याउको लागि १३ जनाले अनुदान पाएका हुन् ।

त्यस्तै मौरीपालनमा २० जना युवाले अनुदान प्राप्त गर्ने भएका छन् । रु एक लाख ८० हजारका दरले ३६ लाख मौरीपालनमा अनुदान जाने अधिकृत हमालले बताउनुभयो ।

अनुदानको लागि कोटा भन्दा दोब्वर निवेदन परेका जिल्ला कृषि कार्यालयले जनाएको छ । तरकारीखेतीका लागि १९१, मौरीपालनको लागि ९९ र च्याउ खेतीका लागि ३५ निवेदन परेको थियो । यस अघि देखि नै व्यावसायिक रुपमा तरकारीखेती गर्दैआएका, अनुभव भएका र विदेशबाट फर्केकालाई प्राथमिकता दिइएको जनाइएको छ ।

“एक वर्षमा पाँच रोपनी जग्गामा तरकारीखेती गरेका युवा कृषकले मात्र अनुदान पाउँछन्, हिउँदे र वर्षे दुवै याममा गरी पाँच÷पाँच रोपनीमा तरकारीबाली लगाउनैपर्छ” अधिकृत हमालले भन्नुभयो ।

त्यस्तै च्याउखेतीको लागि चार वटा प्लास्टिक घरमा व्यावसायिक च्याउखेती गरेका कृषकले मात्र अनुदान पाएका छन् । मौरीपालनको लागि कम्तीमा पनि २० घार मौरीपालन गर्ने कृषकलाई अनुदान दिइएको जनाइएको छ ।

कार्यालयले तरकारी र मौरीपालनको लागि रु २०/२० हजार गरी पहिलो र दोस्रो किस्तामा अनुदान रकम दिने भएको छ । कृषकले तरकारीमा पहिलोचरणमा पाँच रोपनीमा हिउँदेबाली लगाएपछि रु २० हजार र दोस्रो वर्षेबाली पाँच रोपनीमा लगाएपछि मात्र पूरा अनुदान प्राप्त गर्ने छन् ।

त्यस्तै च्याउ उत्पादन हुन थालेपछि अनुदान दिइने कार्यालयका कृषिप्रसार अधिकृत विप्लबप्रसाद अधिकारीले बताउनुभयो । मौरीपालक कृषकलाई पनि सोही अनुसार किस्ता–किस्तामा अनुदान रकम दिइने उहाँको भनाइ छ ।

अनुदानको लागि व्यक्ति, समूह र सहकारी पनि छनोट भएका छन् । युवाले चलाएका केही कृषि सहकारी र कृषि समूह समेत तरकारीखेती कार्यक्रमका लागि छानिएका छन् । अनुदानका लागि छनोट भएका कृषकलाई विभिन्न चरणमा गरेर तरकारीखेती, च्याउखेती र मौरीपालन सम्बन्धी तालिम कृषि कार्यालयले दिइरहेको छ ।
कृषिमा युवालाई लक्ष्य गरी कार्यक्रम आएपछि गाउँ–गाउँका युवा उत्साहित बनेका छन् । कार्यक्रमले विशेष गरी ग्रामीण क्षेत्रका युवा कृषकलाई प्राथमिकता दिएको छ । एकै वर्षमा १०० युवा कृषि उद्यममा लाग्दा यहाँको कृषि व्यवसाय फस्टाउने विश्वास गरिएको छ ।

प्रतिक्रिया