नेपालमा हात्तीपाइले (फाइलेरिया) रोग निवारण कार्यक्रम सरकारले सन् २००३ देखि लागू गरेपछि झापामा आगामी फागुन २३, २४ र २५ गते खुवाउने औषधि चौथो पटक हो ।

झापामा सन् २०१२ देखि औषधि खुवाउन लागेको हो भने यस पटक सात लाख ८२ हजार मानिसलाई यो औषधि खुवाउन ४०० स्वास्थ्यकर्मी र तीन हजार ६०० स्वयम्सेवक परिचालन गर्ने बताइएको छ ।

रोगको सङ्क्रमण हुनबाट बचाउन र रोग लागिसकेका बिरामीलाई सरल तथा प्रभावकारी स्वयम् उपचार विधि अपनाउन जिल्ला जनस्वास्थ्य कार्यालयले प्रचारप्रसार, विद्यालयस्तरीय शिक्षा कार्यक्रम रणनीति अपनाउन लागेको छ ।

सन् २०२० सम्ममा निर्मूल पार्ने यो रोग सन् २०१२ मा झापामा तीन हजार ९७० जनामा देखिएको थियो ।

दुई वर्षदेखि ७० वर्ष उमेर समूहका मानिसले खाने यो औषधि विशेष रोग लागेका, गर्भवती महिला र सात दिनका सुत्केरी महिलालाई खान रोकिने बताइएको छ ।

क्युलेक्स नाम गरेको लामखुट्टेको टोकाइबाट सर्ने यो रोगको औषधिसँगसँगै जुकाको औषधि पनि खुवाउने कार्यक्रम रहेको छ ।

सो अवसरमा सभापतिको आसनबाट प्रमुख जिल्ला अधिकारी तेजप्रसाद पौडेलले सरकारले नागरिकको स्वास्थ्यका लागि सञ्चालन गरेको यो अभियानलाई सफल बनाउन सबैले आ–आफ्नो तहबाट सहयोग गर्न आग्रह गर्नुभयो ।

कार्यक्रममा स्थानीय विकास अधिकारी फणीन्द्र दाहाल, वरिष्ठ जनस्वास्थ्य अधिकृत चन्द्रदेव मेहता, जनस्वास्थ्य कार्यालयका ब्रजेश मेहताले पनि हात्तीपाइले रोगको अवस्थाबारेमा जानकारी गराउनुभएको थियो ।

यसैगरी, झापा जिल्लालाई यसवर्ष १० वटा गाविस पूर्ण खोप गाविस घोषणा गर्ने तयारी गरिरहेको जिल्ला जनस्वास्थ्य कार्यालयले आगामी वर्षमा जिल्लालाई नै पूर्णखोपयुक्त जिल्ला घोषणा हुने कार्यक्रमसहित अघि बढिरहेको जनाएको छ ।