फलामे पोल र तार अलपत्र अवस्थामा छन् । विद्युत् विस्तारका लागि नेपाल विद्युत् प्राधिकरणले चासो नदिएपछि विद्युत् बल्न नसकेको स्थानीयको भनाइ छ ।

ग्रामीण विद्युतीकरणअन्तर्गत जाइकाले पोल गाडेको तीनवर्ष बितेको छ । पोलमा लगाउने तार ल्याएर थुपारिएको पनि लामो समय बितिसक्यो । “बिजुलीका सरसामान ल्याएको लामो समय बित्दा पनि प्राधिकरणले वास्ता नगरेपछि अहिले पोल, तार र अन्य सामान हराउन थालेका छन्” आमचोक–५ का दधिराम लामिछानेले भन्नुभयो ।

आमचोकको दशमीदेखि आमचोक हुँदै फूएतप्पासम्म विद्युत्का फलामे पोल गाडिएको छ । विद्युत् प्राधिकरणले दिएको पोल र तार अहिले काम नलाग्ने अवस्थामा पुगेको छ । विद्युत् विस्तारका लागि कुनै प्राविधिक पनि नआएको स्थानीयको गुनासो छ । अब पनि विद्युत् विस्तार नभएर सामग्री सबै हराउने र पोल स्थानीयले लघु जलविद्युत्मा लगाउने भएको स्थानीय कविराज लिम्बूले बताउनुभयो ।

दशमीदेखि फूएतप्पासम्ममा करिब १२० वटाभन्दा बढी पोल गाडिए पनि अहिले ती पोल प्रयोगविहीन छन् । तार र अन्य सामग्री जतासुकै छरपस्ट छन् । आमचोक, फूएतप्पा, लुम्दे गाविसका लागि दशमी–सिंहदेवी उच्च मावि हुँदै पोल गाडिए पनि प्राधिकरणको लापर्बाहीका कारण बिजुली नबलेको स्थानीयको भनाइ छ ।

सरकारले करोडौँ रुपैयाँमा पोल, तार र अन्य सामग्री खरिद गरेपनि तिनको उचित संरक्षण र सम्वद्र्धन हुन नसकेको स्थानीय बताउँछन् ।

पोल बाङ्गोटिङ्गो गाडिएको, प्राविधिक दृष्टिकोणले काम नभएकाले विद्युत् विस्तार हुन नसकेको नेपाल विद्युत् प्राधिकरण इलाम शाखाका कर्मचारी तारा एक्तेन बताउनुहुन्छ ।

विद्युत् विस्तारका लागि नेपाल विद्युत् प्राधिकरणमा जानकारी गराए पनि अहिलेसम्म प्राधिकरणले कुनै चासो नदिएको स्थानीयवासी बताउँछन् ।