इनेप्लिज
२०७१ फागुन ४ गते ९:१२ मा प्रकाशित
भद्रपुर, ४ फागुन । झापामा १३ प्रतिशत मानिसमा हात्तीपाइले रोगको असर रहेकाले फागुन महिनाको २३, २४ र २५ गते हात्तीपाइले रोग र जुकाको औषधि एकसाथ खुवाइने भएको छ ।
जिल्ला जनस्वास्थ्य कार्यालय झापाले लगभग सात लाख ८२ हजार ३६४ जनालाई ती औषधि खुवाउने लक्ष्य लिएको छ । यसका लागि कार्यालयबाट तीन हजार ६०० स्वयम्सेविका र ५०० स्वास्थ्यकर्मी परिचालन गर्ने वरिष्ठ जनस्वास्थ्य अधिकृत चन्द्रदेव मेहताले जानकारी दिनुभयो ।
सो चक्कीसँगसँगै सबैलाई जुकाको औषधि पनि खुवाउनका लागि ५० घरधुरीका लागि एक स्वयम्सेविका रहने तयारीमा कार्यालय जुटेको छ ।
छ पटकसम्म खानुपर्ने यो चक्की झापामा यो पटकको चौथो हो भने गर्भवती, दुई वर्षमुनिका र विशेष रोग लागेका मानिसलाई यो औषधि खान नहुने भनिएको छ ।
चक्की दुई वर्षदेखि पाँच वर्षकाले एक, छ वर्षदेखि १४ वर्षकाले दुई र त्योभन्दा माथि उमेर समूहकाले तीन चक्की सेवन गर्नुपर्ने जनाइएको छ ।
चक्की खाली पेटमा खान नहुने, खाइसकेपछि आराम गर्नुपर्ने र प्रसस्त पानी पिउनुपर्ने भएकाले सेवनकर्ताले विशेष ध्यान दिनुपर्ने छ ।
प्रतिक्रिया