शनिबार, मंसिर १३ २०७७
काठमाडौं २२:०२
वासिङटन डिसी 11:17

ज्येष्ठ नागरिक प्रशिक्षक प्रशिक्षण तालिम सम्पन्न

इनेप्लिज २०७१ फागुन १ गते १:४१ मा प्रकाशित

इटहरी, १ फागुन । राष्ट्रिय ज्येष्ठ नागरिक महासङ्घ र महिला तथा बालबालिका मन्त्रालयको सहकार्यमा ज्येष्ठ नागरिकसम्बन्धी दुईदिने समीक्षा योजना तर्जुमा गोष्ठी र पाँचदिने स्याहारकर्ता प्रशिक्षक प्रशिक्षण तालिम हिजो यहाँ सम्पन्न भएको छ ।

तालिम समापन समारोहमा सहभागी पाँचथरकी शारदा दाहाल, झापाका पङ्कज दाहाल, भोजपुरका श्याम खड्का, धनकुटाकी सरस्वती श्रेष्ठले संविधानमा नै ज्येष्ठ नागरिकको हकअधिकारको ग्यारेण्टी हुनुपर्ने धारणा राख्नुभएको थियो ।

महिला तथा बालबालिका मन्त्रालयका उपसचिव मीरा शेरचनले ज्येष्ठ नागरिकका विषयमा मन्त्रालयले नीतिमा सुधार ल्याउने र ऐन संसोधनको तयारी भइरहेको उल्लेख गर्दै ज्येष्ठ नागरिकसम्बन्धी पछिल्लो समयमा धेरै सुधारका कार्य भइरहेको बताउनुभयो ।

उपसचिव शेरचनले प्रशिक्षक तालिम प्राप्त भएकाले जिल्ला जिल्लामा गएर ज्येष्ठ नागरिकसम्बन्धी अप्ठ्यारालाई समाधान निकाल्न सक्रिय हुनुपर्नेमा जोड दिनुभयो ।

राष्ट्रिय ज्येष्ठ नागरिक महासङ्घका केन्द्रीय अध्यक्ष डा गौरीशङ्करलाल अग्रवालले ज्येष्ठ नागरिकसम्बन्धी पछिल्लो समयमा राज्यले पनि महत्व दिन थालेकोमा सन्तुष्टि व्यक्त गर्नुभयो ।

तालिममा पूर्वी नेपालको १६ जिल्लाका ज्येष्ठ नागरिक महासङ्घका पदाधिकारी, महिला तथा बालबालिका कार्यालयका प्रतिनिधि तथा ज्येष्ठ नागरिकसँग सरोकार राख्नेको सहभागिता रहेको थियो ।

प्रतिक्रिया