एमाले झापाले सुरु गरेको शान्ति र संविधानका लागि सयदिने जागरण अभियानको उद्घाटन गर्दै उहाँले सामान्य बहुमतमा रहँदा पहिलो संविधानसभामा एमाओवादी मतदानमा आतुर थियो तर आज सहमतिको रटान गरिरहनु र दुई तिहाइका विरुद्ध सडक रोज्नुले उसले विधि र प्रक्रिया मान्दैन भन्ने प्रस्ट छ भन्नुभयो ।

उहाँले भन्नुभयो–“अन्तरिम संविधानको भावना केलाउँदा पनि संविधान निर्माणको विधि प्रक्रिया नै हो, दुई तिहाइले निर्णय गर्नुपर्छ र संविधानसभाका ६०१ सदस्यको दुई तिहाइको हस्ताक्षर हुनैपर्छ ।”

अहिले नेकपा (एमाले)को मार्गचित्रमा मुलुक हिँडिरहेको जिकिर गर्दै उहाँले सोही मार्गमा सबै राजनीतिक दललाई हिँडाउन आफूहरु प्रयत्नशील रहने बताउनुभयो ।

अभिमुखीकरण कार्यक्रममा केन्द्रीय सदस्य हिक्मत कार्की र वैकल्पिक केन्द्रीय सदस्य रवीन कोइरालाले प्रशिक्षण दिनुभएको थियो । संविधानसभाबाट संविधानका अन्तर्वस्तु र कार्यसूची विषयमा पोखरेलले अभिमुखीकरण गर्नुहुनेछ । एमाले झापा जिल्ला कमिटी, सोभन्दा माथिल्ला कमिटीका सदस्य, जिल्लाका जनवर्गीय सङ्गठनका अध्यक्ष, विभागीय समितिका प्रमुख, क्षेत्रीय कमिटी र नगरकमिटीका पदाधिकारी सहभागी रहेको कार्यक्रममा जिल्ला अध्यक्ष चिन्तन पाठकले अभियानको चारसूत्रीय औचित्य प्रस्ट्याउँदै संविधान निर्माणमा एमालेले खेलेको भूमिका, संविधान निर्माणमा बाधक पक्षको भण्डाफोर, पार्टी र जनताबीचको अन्तरसम्बन्धलाई प्रगाढ बनाउने तथा पार्टीको आन्तरिक जीवन र सङ्गठनलाई सुदृढ बनाउने उद्देश्य रहेको बताउनुभयो ।